Եվրատեսիլ 2014–ում հաղթանակի ավելի մեծ հնարավորություն ունի Արամ MP3–ն. Ժիրինովսկի
ԵՐԵՎԱՆ, 7 մայիսի. /Նովոստի–Արմենիա/. «Եվրատեսիլ 2014» երգի մրցույթում հաղթանակի ավելի մեծ հնարավորություն ունի Հայաստանը ներկայացնող Արամ MP3–ն, կարծում է ՌԼԴԿ–ի առաջնորդ Վլադիմիր Ժիրինովսկին։
«Ինչու՞, որովհետև մոտենում է շատ տխուր մի տարելից` այդ սարսափելի իրադարձությունների 100–րդ տարելիցը (1915 թ.–ի Հայոց ցեղասպանություն, «Նովոստի–Արմենիա»)։Աշխարհի և Եվրոպայի բոլոր հայերը քվեարկելու են, և այդ երիտասարդը, գործադրելով բոլոր ջանքերը, հուսահատության մեջ այնպես կկատարի երգը, որ հաղթելու մեծ շանսեր կունենա, և ես խոստանում եմ, որ հաջորդ տարի մենք մեծ ինքնաթիռով բոլորս կուղևորվենք Երևան` Եվրատեսիլին», – հայտարարել է Ժիրինովսկին «Ռոսիա» հեռուստաալիքի եթերում։
Հարկ է նշել, որ համաշխարհային բուքմեյքերական գրասենյակները նվազեցրել են Եվրատեսիլ-2014–ում հայ ներկայացուցիչ Արամ MP3–ի հաղթանակի հնարավորությունները, սակայն նա շարունակում է մնալ մրցույթի ֆավորիտների եռյակում։
Երեքշաբթի երեկոյան տեղի ունեցավ Եվրատեսիլի առաջին կիսաեզրափակիչը, որի արդյունքում եզրափակիչ դուրս եկան տասը երկիր` Հայաստանը, Մոնտենեգրոն, Հունգարիան, Ռուսաստանը, Ադրբեջանը, Ուկրաինան, Սան Մարինոն, Շվեդիան, Նիդեռլանդները և Իսլանդիան։
Երկրորդ կիսաեզրափակիչ փուլում` մայիսի 8–ին, կներկայանան ևս 15 երկրների` Մալթայի, Իսրայելի, Նորվեգիայի, Վրաստանի, Լեհաստանի, Ավստրիայի, Լիտվայի, Ֆինլանդիայի, Իռլանդիայի, Բելառուսի, Մակեդոնիայի, Շվեյցարիայի, Հունաստանի, Սլովենիայի և Ռումինիայի ներկայացուցիչները։
Երգի մրցույթի եզրափակիչ շոուն կանցնի մայիսի 10–ին։ Դրան կմասնակցեն երկու կիսաեզրափակիչների տասական մասնակիցներ, որոնք կպայքարեն նաև «մեծ հնգյակի» երկրների (Իսպանիա, Գերմանիա, Իտալիա, Մեծ Բրիտանիա, Ֆրանսիա) ներկայացուցիչների, ինչպես նաև Եվրատեսիլը հյուրընկալող երկրի` Դանիայի հետ։
«Եվրատեսիլ-2014» մրցույթն անցնում է Կոպենհագենում։ Եվրաշոուի բոլոր կիսաեզրափակիչները և եզրափակիչն անցկացվում են Refshaleoen–ի B&W Hallerne բեմում։
Կոպենհագենն արդեն երկու անգամ ընդունել է մրցույթը` 1964 և 2001 թթ.–ին, իսկ 2005 թ.–ին այնտեղ անցկացվել են «Եվրատեսիլի» 50–ամյակին նվիրված տոնակատարությունները։
Հայաստանը մասնակցում է «Եվրատեսիլ» մրցույթին` սկսած 2006 թվականից։ 2008 թվականին լավագույն արդյունքը ցույց տվեց Սիրուշոն` զբաղեցնելով չորրորդ տեղը։
2013թ.–ին Հայաստանը ներկայացրեց Dorians ռոք խումբը, որը Շվեդիայի Մալմո քաղաքում տեղի ունեցած «Եվրատեսիլ–2013» երգի մրցույթի ժամանակ «Lonely Planet» երգով զբաղեցրեց 18–րդ տեղը։–0-
