ԵՐԵՎԱՆ, 13 մարտի. /Նովոստի–Արմենիա/. Ռուբեն Դիշդիշյանն ու Արամ Մովսեսյանն ընդգրկվել են Ֆաթիհ Ակինի նոր «Սպի» ֆիլմի պրոդյուսերների կազմում։ Սա «Մարս Մեդիա» կինոընկերության առաջին միջազգային նախագիծն է, հաղորդում է thr.ru–ն։
«Սպի» ֆիլմը իտալա–ֆրանսիա–գերմանա–ռուսական համատեղ արտադրություն է դարձել։ Ֆիլմի պրոդյուսերների կազմում ընդգրկված են նաև Կառլ Բաումգարտները («Վարդակակաչ», «Գավր»), Ռեյնհարդ Բրունդիգը («Գավր», «Եկ դա արագ անենք», «Թամբած կետը»), Ֆաբիեն Վոնյերը («Հոգու խոհանոցը», «Գավր»), նշում է հրատարակությունը։
Ֆաթիհ Ակինը գերմանաբնակ ազգությամբ թուրք ռեժիսոր է («Հոգու խոհանոց», «Գլխով պատին», «Դրախտի եզրին», «Նյու Յորք, սիրում եմ քեզ»)։ «Գլխով պատին» ֆիլմը (2004) նվաճել է բազմաթիվ մրցանակներ, որոնց թվում են` «Ոսկե արջը» և Բեռլինի կինոփառատոնին արժանացած կինոմամուլի միջազգային ֆեդերացիայի մրցանակը, ինչպես նաև եվրոպական կինոակադեմիայի «Լավագույն ֆիլմ» անվանակարգի մրցանակը։ 2009 թ.–ին Վենետիկի կինոփառատոնի ժամանակ «Հոգու խոհանոց» ֆիլմն արժանացավ Ժյուրիի հատուկ մրցանակի։ «Սպի» ֆիլմի սյուժեն չի հրապարակվում։
Ինչպես հաղորդում է thr.ru–ն, Դիշդիշյանը հուսով է, որ ֆիլմը կմասնակցի Կաննի կինոփառատոնի մրցույթին։ Իսկ ամռանը Ֆաթիհ Ակինը կներկայացնի «Սպին» Մոսկվայում` Մոսկվայի միջազգային կինոփառատոնի շրջանակներում նախատեսված հատուկ ցուցադրության ժամանակ և Երևանում` «Ոսկե ծիրան» փառատոնի շրջանակներում։
Ռուբեն Դիշդիշյանը ռուսաստանաբնակ հայազգի հեռուստա–կինոպրոդյուսեր է։ 1995 թ.–ին նա հիմնադրել է «Ցենտրալ Պարտնըրշիպ» խոշորագույն ռուսական կինոընկերությունը, որի գլխավոր տնօրենի պաշտոնը զբաղեցնում էր մինչև 2011 թ.–ը։ 2011 թ.–ի նոյեմբերին նա ստեղծել է «Մարս Մեդիա Էնթերթեյնմենթ» ՍՊԸ–ն, որի գործունեության առաջնահերթ ուղղություններից է կինո-հեռուստաարտադրությունը։
Արամ Մովսեսյանը ռուսաստանաբնակ հայազգի հայտնի պրոդյուսեր է, մասնակցել է տասնյակ ֆիլմերի ստեղծմանը։ –0–
