ԵՐԵՎԱՆ, 25 հուլիսի. /Նովոստի-Արմենիա/. Իրանում հայկական հնագույն պատմական հուշարձանները լավ վիճակում են, երկուշաբթի լրագրողներին հայտնեց Հայկական ճարտարապետության ուսումնասիրման հասարակական կազմակերպության (Research on Armenian Architecture, RAA) ղեկավար Սամվել Կարապետյանը:
«Հուշարձանների վերականգնումը շատ գրագետ է անցկացվում, ոչ մի հատվածում չես տեսնի նորարարություններ, պահպանվել է հուշարձանների սկզբնական ճարտարապետությունը»,- ասաց նա՝ ավելացնելով, որ դա խոսում է այն մասին, որ իրանական կողմը մտադիր է պետական մակարդակով պահպանել հայկական հնագույն հուշարձանները:
Հայ հետազոտողների աշխատանքային խումբն Իրանում է գտնվել հունիսի 10-ից հուլիսի 10-ը: Իրանի հայկական մշակութային ժառանգության մաս կազմող հուշարձանների ուսումնասիրման լայնածավալ ծրագիրն ընդգրկել է հինգ գավառ, որոնք պատմական Հայաստանի մաս են կազմել (Պարսպատունիք, Մակու (Արտաս), Խոյ, Զարևանդ (Սալմաստ), Ուրմիա (Կապուտան):
Կարապետյանի խոսքով, Իրանի հայկական հնագույն հուշարձանների ուսումնասիրությունը հնարավոր դարձավ Հայաստանի մշակույթի նախարարության աջակցության շնորհիվ:
Նա նշեց, որ ուսումնասիրությունն անցկացվել է հայ-իրանական նախագծի շրջանակներում Թեհրանի թանգարանի համագործակցությամբ ի դեմս դրա տնօրեն Շերլի Ավետյանի:
Կարապետյանը հայտնեց, որ հայկական նախկին նահանգների տարածքներում գտնվող հուշարձանների թիվը հասնում է մի քանի հազարի:
«Մենք վերադարձանք 6 000 լուսանկարներով: Կարծում ենք, որ լուսանկարել ենք 4 000 – 4 500 հուշարձան, բայց թե որքան է դեռ մնացել՝ չեմ կարող ասել»,- ասաց նա:
Որոշ տվյալներով, այժմ Իրանում գործում է 40 հայկական եկեղեցի: -0-
