Հայաստանում առաջին անգամ Մեքսիկայի մշակույթի օրեր են անցկացվում

Հայաստանում առաջին անգամ  հունիսի 9-11-ը Մեքսիկայի մշակույթի օրեր են անցկացվում։

«Չնայած անցկացման փոքր ժամանակահատվածին՝ շատ հարուստ ծրագիր է կազմվել»,- հինգշաբթի ասուլիսի ժամանակ ասաց ՀՀ մշակույթի փոխնախարար Արև Սամուելյանը։

Մշակույթի օրերը մեկնարկել են լուսանկարների ցուցահանդեսով, որը նվիրված է անցած դարի 20-ական թվականների Մեքսիկայի ազատագրական շարժմանը։

Ինչպես տեղեկացրեց Սամուելյանը, Օրերի շրջանակներում մեքսիկացի ռեժիսորների երեք գեղարվեստական ֆիլմ կցուցադրվի՝ Էմիլիո Ֆերնանդեսի «Սիրահարները», Ֆերնանդո դե Ֆուզնետեսի «Մենդոսի կնքահայրը» և Լուիս Բունյուելի «Երազանքը ճանապարհորդում է տրամվայով»։

Բացի այդ, ուրբաթ Հայաստանում Մեքսիկայի արտակարգ և լիազոր դեսպան Ալֆրեդ Պերես Բրավոն դասախոսություն կկարդա Երևանի Բրյուսովի անվան պետական լեզվաբանական համալսարանում։
Նույն օրը Երևանի Գեղագիտության ազգային կենտրոնում տեղի կունենա մանկական նկարների «Մեքսիկան իմ աչքերով» մրցույթը։

Մեքսիկայի դեսպանն իր ելույթում նշեց հայ երեխաների փայլուն տաղանդը։ Նա ավելացրեց, որ հանրապետության մշակույթի նախարար Հասմիկ Պողոսյանի հետ քննարկել է մանկական մրցույթի անցկացման հարցը և դրական պատասխան է ստացել։

Մրցույթին ներկայացվել է Գեղագիտության կենտրոնի սաների շուրջ 150 նկարներ։ Հաղթողները մրցանակներ կստանան անմիջապես մեքսիկացի դեսպանից։

Հայաստանում Մեքսիկայի մշակույթի օրերը կազմակերպվել են ՀՀ մշակույթի նախարարության և Մեքսիկայի դեսպանատան համատեղ ջանքերով։ -0-