Արթուր Աբրահամը հանդես կգա Եվրատեսիլ-2011 հայկական երգի հոլովակի գլխավոր դերում

Գերմանահայ հայտնի բռնցքամարտիկ Արթուր Աբրահամը Boom-Boom երգի տեսահոլովակի հերոս կդառնա: Այդ երգով երգչուհի Էմմին  հանդես կգա Դյուսելդորֆում անցկացվելիք Եվրատեսիլ-2011 մրցույթում:

Երկուշաբթի մամուլի ասուլիսի ընթացքում Էմմին չհայտնեց հոլովակի սյուժեի մանրամասները՝ նշելով, որ դա անակնկալ է լինելու: «Ասեմ միայն, որ հոլովակը պատրաստ կլինի շաբաթվա ընթացքում: Այն նկարահանվել է Հայաստանում և Գերմանիայում: Տեսահոլովակի ռեժիսորն է Հրանտ Երիցկինյանը»,- երկուշաբթի լրագրողներին հայտնեց Էմմին:

Բացի այդ, նա հայտնեց, որ առաջիկա օրերին կսկսի իր պրոմո-շրջայցը եվրոպական երկրներով:

«Մեր երգն, ընդհանուր առմամբ, ոչնչի մասին է: Դա պարզապես ուրախ, պարելու կանչող երգ է: Հուսով եմ, որ այն միանգամյա չի լինի, և մրցույթից հետո կշարունակի մեզ ուրախացնել»,- ընդգծեց Էմմին:
Երգչուհին նշեց, որ իր գործունեությունը Եվրատեսիլ-2011-ի շրջանակներում նա նվիրում է իր հոր՝ փետրվարին անժամանակ մահացած հայտնի քանդակագործ Դավիթ Բեջանյանի հիշատակին:
Էմմիին «Եվրատեսիլ-2011»-ին ուղարկելու մասին որոշումն առանց որևէ ազգային ընտրության ընդունել է ՀՀՀ-ի ղեկավարությունը:

2010 թվականին Էմմին արդեն պայքարել է Եվրատեսիլում Հայաստանը ներկայացնելու իրավունքի համար: Այն ժամանակ նրա գլխավոր մրցակիցն էր Եվա Ռիվասը, ով հաղթեց ազգային ընտրության լարված պայքարի արդյունքում և Եվրատեսիլ-2010-ում զբաղեցրեց յոթերորդ տեղը:

Հայաստանը «Եվրատեսիլ»-ին է մասնակցում 2006 թվականից: 2008 թվականին երգչուհի Սիրուշոն մրցույթում գրավեց չորրորդ տեղը՝ առաջ անցնելով երկիրը ներկայացնող նախորդ երգիչներ Անդրեին ու Հայկոյին, ովքեր ութերորդ տեղն էին զբաղեցրել:--0-