Երևանյան HighFest փառատոնը կհամագործակցի Եվրոպայի 4 փառատոների հետ

HighFest երևանյան միջազգային թատերական փառատոնի ղեկավարությունը համագործակցության համաձայնագիր է ստորագրել Արևելյան և Հարավային Եվրոպայի 4 փառատոների հետ, ասաց փառատոնի կազմկոմիտեի նախագահ Արթուր Ղուկասյանը։

Նրա խոսքերով, HighFest-ը համագործակցելու է Բելգրադի միջազգային թատերական փառատոնի BITEF, Սարաևոյի արվեստների միջազգային փառատոնի, Զագրեբի կիրառական արվեստների միջազգային փառատոնի և Նիտրայի միջազգային թատերական փառատոնի հետ։

«Համաձայնագրերի շրջանակներում նախատեսվում է փոխօգնության ցուցաբերում, մասնավորապես խոշոր թատերախմբերի հրավերի առնչությամբ, որոնք դժվարությամբ են համաձայնում հյուրախաղերի մեկնել»,- ասաց նա հինգշաբթի մամուլի ասուլիսի ժամանակ։

Բացի այդ, Ղուկասյանն ասաց, որ նախատեսվում է ներկայացումների ցուցադրում ծրագրի մասնակից-երկրներում, ինչպես նաև դերասանների մասնակցություն արտասահմանյան բեմադրություններում։

HighFest վեցերորդ միջազգային թատերական փառատոնը, որին կմասնակցեն 30 երկրների (Հայաստան, Ռուսաստան, ԱՄՆ, Կանադա, Մեծ Բրիտանիա, Գերմանիա, Իտալիա, Իսպանիա, Էստոնիա, Ղազախստան և այլն) դերասաններ ու պարողներ, կանցկացվի Երևանում և Գյումրի քաղաքում հոկտեմբերի 4-12-ը։ Հանդիսատեսին կցուցադրվի 100 ներկայացում, որոնք կցուցադրվեն 17 թատերաբեմերում։

Փառատոնի անցկացման համար ՀՀ Մշակույթի նախարարությունը 35 մլն դրամ է հատկացրել (շուրջ 115 հազար ԱՄՆ դոլար)։

Առաջին HighFest միջազգային թատերական փառատոնն անցկացվել է 2003 թ.-ին և մեծ հաջողություն է ունեցել, ինչի շնորհիվ Հայաստանն ինտեգրվել է ASSITEJ(Մանկական և պատանեկան թատրոնների միջազգային ընկերակցություն) և IETM (Համաեվրոպական թատերական ցանց) միջազգային թատերական ցանցերում։  

2006 թ.-ից HighFest-ը գլխավոր թատերական փառատոնն է նախկին ԽՍՀՄ տարածքում։ --0--