«Հայաստանի փոքրիկ երգիչներ» մանկական երգչախումբը տոնում է իր 15-ամյա հոբելյանը

ԵՐԵՎԱՆ, 20 դեկտեմբերի./Նովոստի-Արմենիա/. Ուրբաթ՝ դեկտեմբերի 21-ին, Երևանում տեղի կունենա «Հայաստանի փոքրիկ երգիչներ» մանկական երգչախմբի հոբելյանական համերգը՝ նվիրված երաժշտական համույթի 15-ամյակին։

«Համերգի ընթացքում Երևանի հանդիսատեսը կարող է գնահատել երգչախմբի մասնակիցների վարպետությունը, և մենք կարող ենք կրկին ապացուցել, որ մեր կոլեկտիվն արժանի է բարձր գնահատականների»,- հինգշաբթի մամուլի ասուլիսի ժամանակ հաղորդեց երգչախմբի հիմնադիր, գեղարվեստական ղեկավար և գլխավոր դիրիժոր Տիգրան Հեքեքյանը։

Երգչախմբի ղեկավարը նշեց, որ կոլեկտիվը հայկական պետականության հասակակիցն է։ «Մեր պետության կայացմանը զուգահեռ մենք հաղթահարում էինք բոլոր դժվարությունները, որոնք ծառանում էին մեր ճանապարհին՝ հույս դնելով միայն մեր ոգևորվածության վրա»,- ասաց նա։

Իր հերթին ՀՀ մշակույթի փոխնախարար Կարինե Խոդիկյանը բարձր գնահատեց «Հայաստանի փոքրիկ երգիչների» ստեղծագործական գործունեությունը։ «Ուրախացնում է հենց միայն այն փաստը, որ Հայաստանում գործում է այսպիսի կոլեկտիվ, և մեր երկիրը կարող է հպարտանալ նրանով»,- նշեց նա։

«Այն երեխան, որը երգում է այս երգչախմբում և այն երեխան, որը լսում է նրանց երգերը, չի կարող վատ մարդ մեծանալ»,- ասաց նա՝ ընդգծելով կոլեկտիվի և նրա ղեկավարների դաստիարակչական դերը։

Խոդիկյանը տեղեկացրեց, որ ուրբաթ օրը հոբելյանական համերգին երգչախմբի ռեժիսոր Էլմիրա Հեքեքյանին հանձնվելու է ՀՀ մշակույթի նախարարության ոսկե մեդալ, իսկ երաժշտական կոլեկտիվի բոլոր մասնակիցները կստանան Մշակույթի նախարարության պատվոգրեր

Հոբելյանական համերգին ելույթ կունենան երգչախմբի տարբեր տարիների մասնակիցները՝ «Հայաստանի փոքրիկ երգիչները» (9-18 տարեկան) և «Հայաստանի ամենափոքրիկ երգիչները» (4-7 տարեկան)։

«Հայաստանի փոքրիկ երգիչներ» երգչախումբը ստեղծվել է 1992թ.-ին՝ Երևանի քաղաքապետարանի մշակույթի վարչության և «Հայաստանի փոքրիկ երգիչներ» միջազգային միության մասնակցությամբ։

Երգչախմբում երգում են Հայաստանի տարբեր մարզերից ընդգրկված 4-18 տարեկան տաղանդավոր երեխաներ։ Երգչախումբն ակտիվ մասնակցում է հանրապետության մշակութային կյանքին և բարեգործական համերգներով ելույթներ է ունենում ինչպես Հայաստանում, այնպես էլ նրա սահմաններից դուրս։ Երգչախումբը հյուրախաղերով հանդես է եկել Ռուսաստանում, Հունաստանում, Կիպրոսում, Գերմանիայում. Ֆրանսիայում, Շվեյցարիայում, Մեծ Բրիտանիայում, Եգիպտոսում, Հարավային Աֆրիկայում, Չինաստանում, Լեհաստանում, Բելգիայում, ինչպես նաև Կանադայում և ԱՄՆ-ում։ --0—