Այվազովսկու «Քաոս. Աշխարհի արարում» կտավը կցուցադրվի Երևանում

ԵՐԵՎԱՆ, 6 սեպտեմբերի. /Նովոստի–Արմենիա/. Հայաստանի Ազգային պատկերասրահում սեպտեմբերի 15–ին մեկնարկում է աշխարհահռչակ ծովանկարիչ Հովհաննես Այվազովսկու ծննդյան 200–ամյակին նվիրված ցուցահանդեսը։

Ինչպես հայտնում է թանգարանի մամուլի ծառայությունը, կներկայացվեն Հայաստանի Ազգային պատկերասրահում պահվող գեղանկարչության և գծանկարչության նմուշներ և տարբեր արխիվների վավերագրական նյութեր։

Առաջին անգամ Հայաստանում կցուցադրվի վարպետի «Քաոս.Աշխարհի արարում» հայտնի կտավը Վենետիկի Մխիթարյան միաբանության հավաքածուից։


«Ցուցահանդեսում, ընդհանուր առմամբ, կցուցադրվի մոտ 70 կտավ։ Ցուցադրությունը կտևի մինչև 2018 թվականի հունվարի 15–ը»,– «Նովոստի–Արմենիա» գործակալությանը հայտնեցին թանգարանի մամուլի ծառայությունից։

Իվան (Հովհաննես) Այվազովսկին 19–րդ դարի հայազգի ականավոր ծովանկարիչներից է։ Նրա հարազատ եղբայրը` Գաբրիել Այվազովսկին, հայ հոգևորական է, պատմաբան, լեզվաբան և պոլիգլոտ, սովորել է Մխիթարյան միաբանությունում։ -0-