ԵՐԵՎԱՆ, 24 մարտի./Նովոստի–Արմենիա/. Ստեփանակերտցի Միխայիլ Գրիգորյանը փայլուն ելույթ է ունեցել ռուսական Առաջին ալիքով հեռարձակվող «Ձայնը. երեխաներ 6» երաժշտական հեռուստաշոուի վերջին «Կույր լսումներում»։
Միխայիլը կատարել է Բրունո Մարսի «Versace on the Floor» երգը։ Նրա կողմն են շրջվել Վալերի Մելաձեն և Պելագեան։
«Իմ անունը Միշա Գրիգորյան է։ Ես Հայաստանից` Ստեփանակերտից, 10 տարեկան եմ», – այսպես է ներկայացել Միխայիլը բուռն ծափահարությունների արժանանալուց հետո։
Загружается новость ... "Лево"
«Պատրաստի արտիստ։ Հիանալի երգում է, արտակարգ տեսք ունի, պարում է, խենթացնող է։ Նա ամեն ինչ կարողանում է։ Իսկ նման արտիստները շա՞տ են Ստեփանակերտում», – հարցրել է Մելաձեն, ինչին փոքրիկն առանց մտածելու դրական պատասխան է տվել։
Միշան նաև պատմել է, որ իր հայրը զինվորական նվագախմբի դիրիժոր է, իսկ մայրը երաժշտություն է դասավանդում մանկապարտեզում։
Պատանի երգիչը որպես մարզիչ ընտրում է Մելաձեին։
Միշա Գրիգորյանն «Արցախի ձայներ» խմբի անդամ է։ Նա 2016թ.–ին ներկայացրել է Հայաստանը «Մանկական նոր ալիք» նախագծում, որտեղ զբաղեցրել է երկրորդ տեղը, 2017թ.–ին նա ներկայացրել է Հայաստանը «Մանկական Եվրատեսիլում» ու զբաղեցրել 6–րդ հորիզոնականը։–0–
