Հայտնի է, թե ով կներկայացնի Հայաստանը «Եվրատեսիլ 2020»–ում (ՖՈՏՈ)

ԵՐԵՎԱՆ, 16 փետրվարի./Նովոստի–Արմենիա/. Քիչ առաջ Հանրային հեռուստաընկերության ուղիղ եթերում ավարտվեց «Դեպի Եվրատեսիլ» հայկական ընտրական փուլը, որի արդյունքում «Եվրատեսիլ 2020»–ում Հայաստանը կներկայացնի հունաստանաբնակ հայազգի երգչուհի Աթենա Մանուկյանը` Chains on you երգով։ 

Հաղթողը որոշվեց միջազգային ու հայաստանյան ժյուրիի և հեռուստադիտողի քվեարկության արդյունքում,  և Աթենան հավաքեց 168 միավոր։ 

Հունվարի 28–ին «Դեպի Եվրատեսիլ 2020» նախագծի ժյուրին ընտրել էր 12 թեկնածուների (Աթենա Մանուկյան, TOKIONINE, ERNA, Մարիամ Բաղդասարյան, Agop, Կարինա EVN, Վլադիմիր Արզումանյան, Հայկ Music, Արթուր Ալեքս, Գաբրիել Ջիգ, EVA Rida, Սերգեյ և Նիկոլայ Հարությունյաններ) մրցույթի հայաստանյան փուլին մասնակցելու համար։

Հիշեցնենք, որ այս տարի Հայաստանի ներկայացուցիչը ելույթ կունենա «Եվրատեսիլ 2020»–ի երկրորդ կիսաեզրափակչում։ «Եվրատեսիլ 2020»-ի կիսաեզրափակիչները տեղի կունենան մայիսի 12-ին և 14-ին, իսկ եզրափակիչը՝ մայիսի 16-ին, Նիդերլանդների Ռոտերդամ քաղաքում։–0–