Աննախադեպ ցուցահանդես․ Հայաստանի պատմության թանգարանն ու Բրիտանական թանգարանը կկազմակերպեն եզակի ցուցադրություն
ԵՐԵՎԱՆ, 6 սեպտեմբերի․/Նովոստի–Արմենիա/․ Անկախության օրը՝ սեպտեմբերի 21-ին, Հայաստանի պատմության թանգարանում բացվելու է Հայաստանի համար աննախադեպ ցուցադրություն՝ «Մայր աստվածություն. Անահիտից մինչև Մարիամ» խորագրով: Այս մասին հայտարարեց Հայաստանի պատմության թանգարանի տնօրեն Դավիթ Պողոսյանը։
«Նախկինում արդեն հաղորդվում էր, որ Բրիտանական թանգարանից Երևան կբերվի Անահիտ աստվածուհու բրոնզե արձանի գլուխն ու ձեռքը։ Այն կցուցադրվի Պատմության թանգարանի հնագույն ցուցանմուշների հետ միասին, ինչի արդյունքում թանգարանը կբարձրանա զարգացման նոր մակարդակի վրա», –ասաց Պողոսյանը։
Նրա խոսքով, ցուցահանդեսն աննախադեպ է լինելու ինչպես միջազգային մակարդակով անվտանգության, այնպես էլ բացման հատուկ ձևաչափով։ Տնօրենը հույս հայտնեց, որ նման ցուցահանդեսները Հայաստանում ավանդույթ կդառնան։
Հայաստանի կրթության, գիտության, մշակույթի և սպորտի փոխնախարար Ալֆրեդ Քոչարյանը խորհրդանշական համարեց այն փաստը, որ ցուցահանդեսը բացվելու է Հայաստանի անկախության օրը և նվիրված է լինելու կանանց։
«Մենք շատ ենք կարևորում կանանց դերը Հայաստանի զարգացման գործում»,- խոստովանեց փոխնախարարը։
Նա նաև տեղեկացրեց, որ ցուցահանդեսը խթանելու համար պետական բյուջեից 16 մլն դրամ (ավելի քան $40 հազար) է հատկացվել Մշակույթի զարգացման հիմնադրամին։
Ցուցահանդեսի պատշաճ կազմակերպման համար հուշագիր է ստորագրվել Հայաստանի պատմության թանգարանի, «Կերոն» զարգացման հիմնադրամի և Մշակույթի զարգացման նորաստեղծ հիմնադրամի միջև։
