Երևանի մնջախաղի թատրոնի դերասանուհու բեմադրությունը` Բոսնիա և Հերցեգովինայում կազմակերպված փառատոնի հաղթող
ԵՐԵՎԱՆ, 4 մարտի. /Նովոստի–Արմենիա/. Երևանի մնջախաղի պետական թատրոնի դերասանուհի Նաիրա Եդիգարյանի բեմադրությունը հաղթել է Բոսնիա և Հերցեգովինայում կազմակերպված «Ոսկե լուսան» մնջախաղի միջազգային փառատոնի «Լավագույն շարժում» անվանակարգում, ասաց թատրոնի գեղարվեստական ղեկավար Ժիրայր Դադասյանը։
«Մի քանի օր առաջ ենք տեղեկացել, որ մեր դերասանուհին հաղթել է փառատոնում։ Սա շատ ուրախալի փաստ է մեզ համար», – ավելացրեց Դադասյանը։
Նա նշեց, որ Երևանի մնջախաղի թատրոնը երկրորդ անգամ է մասնակցում փառատոնին։
«Նախորդ տարի նույն փառատոնում հաղթեց մեր հեղինակած «Այբուբեն» նախագիծը», – նշեց Դադասյանը։
Նա ավելացրեց, որ փառատոնի կազմակերպիչները շատ ոգեշնչված էին հայ դերասանների մասնակցությամբ` հաշվի առնելով այն փաստը, որ Երևանի մնջախաղի թատրոնը Ծաղկաձորում անցկացվող Լեոնիդ Ենգիբարյանի անվան միջազգային հեղինակավոր փառատոնի կազմակերպիչն է։
«Փառատոնին մասնակցել են բազմաթիվ երկրների թատրոններ` ԱՄՆ–ից, եվրոպական պետություններից, այդուհանդերձ, առաջին տեղին է արժանացել հենց մեր աշխատանքը», – ընդգծեց Դադասյանը։ –0–
