Էլդար Ռյազանովը խորհրդային ժամանակների լավագույն կատակերգակն էր. Ալեքսանդր Գրիգորյան

ԵՐԵՎԱՆ, 30 նոյեմբերի. /Նովոստի–Արմենիա/. Ռեժիսոր Էլդար Ռյազանովը խորհրդային ժամանակների լավագույն կատակերգակն էր, ուներ հիանալի հումոր, «Նովոստի–Արմենիա» գործակալությանն ասաց Ստանիսլավսկու անվան ռուսական դրամատիկական թատրոնի գեղարվեստական ղեկավար Ալեքսանդր Գրիգորյանը։

 Մահացել է ռեժիսոր Էլդար Ռյազանովը>>

«Ռյազանովը խորհրդային ժամանակների լավագույն կատակերգակն էր, նա հիանալի տիրապետում էր դերասանական, ռեժիսուրայի արվեստներին։ Նրա ֆիլմերը շատ բարի են, ջերմ, մարդկային։ Ռյազանովն ուներ հիանալի հումոր», – նշեց Երևանի Ստանիսլավսկու անվան թատրոնի գեղարվեստական ղեկավարը։

Գրիգորյանը նշեց, որ նրան բախտ չի վիճակվել անձամբ աշխատել խորհրդային կինոյի դասականի հետ, սակայն նա մինչև հիմա հիշում է վարպետի հետ կապված մի դրվագ։

«Մի անգամ ես շփվել եմ Ռյազանովի հետ, երբ ռեժիսորը խնդրեց ինձ թույլ տալ, որպեսզի «Կայարան երկուսի համար» ֆիլմում հայտարարվի, որ հյուրախաղերով քաղաք է ժամանելու Երևանի Ստանիսլավսկու անվան ռուսական դրամատիկական թատրոնը։ Ես մեծ հաճույքով զրուցեցի նրա հետ հեռախոսով, թույլ տվեցի, և այդ թեման ներառվեց նրա ֆիլմում», – ասաց Գրիգորյանը։

Էլդար Ռյազանովը նկարահանել է շուրջ 30 ֆիլմեր, և դրանցից գրեթե յուրաքանչյուրը կինոհիթ է դարձել։ Ռեժիսորի ամենահայտնի ֆիլմերն են «Կարնավալային գիշերը», «Զգուշացիր ավտոմեքենայից», «Ծառայողական սիրավեպ», «Գարաժ», «Ճակատագրի հեգնանքը կամ բաղնիքդ անուշ», «Կայարան երկուսի համար»։–0–