Արամ MP3-ը և Սևակ Խանաղյանը` մեկ բեմում
ԵՐԵՎԱՆ, 3 նոյեմբերի. /Նովոստի–Արմենիա/. Նոյեմբերի 17-ին՝ Ուսանողության միջազգային օրը, Կարեն Դեմիրճյանի անվան մարզահամերգային համալիրում երիտասարդներին և ուսանողներին տոնական համերգային երեկո կպարգևեն սիրված երգիչներ Արամ MP3-ին և Սևակ Խանաղյանը, հաղորդում է Հայաստանի երիտասարդական հիմնադրամի հասարակայնության հետ կապերի ծառայությունը։
Համերգը կազմակերպել են Հայաստանի երիտասարդական հիմնադրամը, ՀՀԿ երիտասարդական կազմակերպությունը, Ջազի հայկական ասոցիացիան։
«Համերգի ընթացքում ի թիվս հին ու սիրված երգերի `Արամ MP3-ն կներկայացնի իր նոր՝ «Սկսում ենք» երգը», – հայտնում են կազմակերպիչները։
Արամ MP3-ն տոների նախաշեմին իր բարեմաղթանքն է հղել երիտասարդներին՝ լինել որքան հնարավոր է խենթ, խելացի, ձգտող, բարդույթներից զուրկ։
«Ցանկանում եմ, որպեսզի մեր երիտասարդները լինեն արգելքները հաղթահարող, անկաշկանդ։ Կաշկանդված մարդն այս դարում որևէ մեկին պետք չէ։ Եվ ամենակարևորը՝ լինեն խենթ ու խելառ, էքսպերիմենտներ սիրող»,- նշել է երգիչը։–0–
