ԵՐԵՎԱՆ, 16 հունիսի. /Նովոստի–Արմենիա/. Իշխանամետ և ընդդիմադիր խմբակցությունների ներկայացուցիչները հինգշաբթի երեկոյան Ընտրական օրենսգրքում ընտրական գործընթացների վերահսկողության տեխնիկական մեխանիզմների ներդրման շուրջ փոխըմբռնման հայտարարություն են ստորագրել։
Ավելի վաղ ընդդիմադիր ուժերն առաջարկել էին ընտրությունների ժամանակ հրապարակել քվեարկության մասնակիցների ստորագրություններով ցուցակները, ընտրացուցակներից հեռացնել հանրապետությունից բացակայող անձանց ազգանունները, քվեարկության ժամանակ մատների թանաքոտում կիրառել, տեսախցիկներ տեղադրել ընտրատեղամասերում։
Հայտարարությունը ստորագրել են Դաշնակցության խորհրդարանական խմբակցության ղեկավար Արմեն Ռուստամյանը, արդարադատության նախարար Արփինե Հովհաննիսյանը, կառավարության աշխատակազմի նախարար-ղեկավար Դավիթ Հարությունյանը, Հայաստանի Ազգային ժողովի պետաիրավական հարցերի մշտական հանձնաժողովի նախագահ, Հայաստանի հանրապետական կուսակցության խորհրդարանական խմբակցության անդամ Հովհաննես Սահակյանը։
Փաստաթղթի տակ ստորագրել են նաև ընդդիմադիր Հայ ազգային կոնգրեսի խմբակցության ղեկավար Լևոն Զուրաբյանը, «Բարգավաճ Հայաստան» խմբակցության ղեկավար Նաիրա Զոհրաբյանը, «Օրինաց երկիր» խմբակցության պատգամավոր Հովհաննես Մարգարյանը, ՀԱԿ խմբակցության անդամ Արամ Մանուկյանը։
Լևոն Զուրաբյանի խոսքով, այս պահին կա համաձայնեցված տեքստ, «որը մենք պատրաստ ենք ստորագրել»։
«Առանց չափազանցման սա կարելի է պատմական իրադարձություն անվանել։ Համաձայնագիրը չի լուծում բոլոր խնդիրները, մասնավորապես, ընտրակաշառքների և վարչական ռեսուրսի օգտագործումը, սակայն ազատ ընտրությունների հիմք է ստեղծում»,- ընդգծեց նա։
Նաիրա Զոհրաբյանն իր հերթին նշեց, որ հասարակության առջև կանգնած մարտահրավերները լուծելու համար պետք է փոքր քայլերով առաջ շարժվել։
Դավիթ Հարությունյանը գոհունակություն հայտնեց, որ բոլոր կողմերն ուժ գտան համաձայնության գալու։
«Սա էլ հենց կոչվում է կոնսենսուս։ Եվ սա անգին փորձ է»,- ընդգծեց նա, համոզմունք հայտնելով, որ Հայաստանի ապագան քաղաքական ուժերի համատեղ աշխատանքն է։
Արդարադատության նախարար Արփինե Հովհաննիսյանն իր հերթին նշեց, որ այդ փաստաթուղթը բացառիկ է հասարակական վստահության բարձրացման տեսանկյունից։
«Այն, որ ընդդիմությունը նման գնահատականներ է հնչեցնում, ցույց է տալիս, որ համաձայնության հասնելու համար արժեր աշխատել»,- ասաց նա։
Ծանոթացեք լուրերին առաջինն ու քննարկեք դրանք մեր Telegram-յան ալիքում
