Ծառուկյանին առնչվող քրեական վարույթի շրջանակում ևս մեկ անձ կալանավորվել է, մեկ անձ էլ ձերբակալվել է. ՔԿ

ԵՐԵՎԱՆ, 7 հուլիսի․/Նովոստի–Արմենիա/․ Գործարար, «Բարգավաճ Հայաստան» կուսակցության առաջնորդ Գագիկ Ծառուկյանին առնչվող քրեական վարույթի շրջանակում ևս մեկ անձ կալանավորվել է, մեկ անձ էլ ձերբակալվել է։

Այս մասին «Նովոստի-Արմենիա»-ի հետ զրույցում հայտնել է ՔԿ մամուլի խոսնակ Կիմա Ավդալյանը։

Նշենք, որ այսօր դատարանի որոշմամբ 2 ամսով կալանավորվել է Գագիկ Ծառուկյանը։

Ինչպես հայտնել է ՀՀ քննչական կոմիտեն, նա կալանավորվել է առանձնապես խոշոր չափերով խարդախության և փողերի լվացման մեղադրանքով։

Ծառուկյանը ձերբակալվել էր հուլիսի 6-ին։ Քննության վարկածով՝ Ծառուկյանի կողմից կազմակերպված քաղաքացիների խումբը զբաղվել է առանձնապես խոշոր չափերի խարդախությամբ և դրամական միջոցների օրինականացմամբ (փողերի լվացմամբ)։ Գործի նյութերի համաձայն՝ նրանք 2022–2024 թվականներին, Իրանի հետ առևտրային կապերի զարգացման պատրվակով, հափշտակել են ավելի քան 8,1 մլրդ դրամի (մոտ 21 մլն դոլար) գույք և հետագայում օրինականացրել ստացված միջոցները։