ԱՊՀ կառավարությունների ղեկավարներն ազատ առևտրի գոտու մասին պայմանագիր են ստորագրել

ԱՊՀ երկրների կառավարությունների ղեկավարների խորհրդի նիստի արդյունքում երեքշաբթի ԱՊՀ ազատ առևտրի գոտու մասին պայմանագիր է ստորագրվել, հաղորդում է «ՌԻԱ Նովոստի» գործակալության թղթակիցը:

Ավելի վաղ ելույթ ունենալով նիստի ժամանակ՝ ՌԴ վարչապետ Վլադիմիր Պուտինը նշել է, որ խոսքը ԱՊՀ-ի շրջանակներում առևտրատնտեսական հարաբերությունների նոր հիմքի ստեղծման մասին է: Նա հիշեցրել է, որ դեռևս 1994 թ.-ին ԱՊՀ երկրները ազատ առևտրի գոտու ստեղծման մասին պայմանագիր են ստորագրել, սակայն այդ փաստաթուղթը չէր վավերացվել շատ պետությունների, այդ թվում Ռուսաստանի կողմից: Այդ պատճառով պայմանագիրրը փաստորեն չէր գործում: Նոր փաստաթղթի ուղղությամբ իրականացվող աշխատանքն ընթացել է գրեթե տասը տարի:

Պայմանագիրը նախատեսում է ստորագրող երկրների միջև առևտրատնտեսական հարաբերությունների իրավական հիմքերի դյուրացում, կփոխվեն մի շարք բազմակողմ և շուրջ 100 երկկողմ փաստաթղթեր, որոնք այսօր ԱՊՀ-ի տարածքում կանոնակարգում են ազատ առևտրի ռեժիմը:

Ստորագրվել է նաև ԱՊՀ երկրներում արժութային կարգավորման և վերահսկման ոլորտում քաղաքականության հիմնարար սկզբունքների մասին համաձայնագիրը, ինչպես նաև ԱՊՀ մասնակից-պետությունների երկաթուղային տրանսպորտի ռազմավարական զարգացման մինչև 2020 թ.-ի հայեցակարգի մասին որոշումը: Ընդհանուր առմամբ ստորագրվել է 28 փաստաթուղթ:

ԱՊՀ-ի կազմում ներառված են Ադրբեջանը, Հայաստանը, Բելառուսը, Ղազախստանը, Ղրղզստանը, Մոլդովան, Ռուսաստանը, Տաջիկստանը, Թուրքմենստանը, Ուզբեկստանն ու Ուկրաինան:-0-