Դատարանը հրաժարվել է ազատ արձակել Կասպերսկու որդուն առևանգելու մեջ մեղադրվող անձանց

Չորեքշաբթի Մոսկվայի քաղաքային դատարանն օրինական է ճանաչել հայտնի ծրագրավորող Եվգենի Կասպերսկու որդի Իվանին առևանգելու գործով մեղադրվող չորս անձանց ձերբակալության ժամկետը մինչև հոկտեմբերի վերջ երկարաձգելը, ՌԱՊՍԻ գործակալությանն է հայտնել դատարանի ներկայացուցիչը:

«Դատական կոլեգիան չի բավարարել մեղադրյալների փաստաբանների վերաքննիչ բողոքները, կալանքի ժամկետի երկարաձգման վերաբերյալ Մոսկվայի Պրեսնենսկի դատարանի որոշումն անփոփոխ է մնացել»,- նշել է գործակալության զրուցակիցը:

Ավելի վաղ Մոսկվայի Պրեսնենսկի դատարանը երկարաձգել է հայր և որդի՝ ավագ Նիկոլայ Սավելևի և կրտսեր Նիկոլայ Սավելևի կալանքի ժամկետը մինչև հոկտեմբերի 24-ը, իսկ գործի երկու մյուս անձանց՝ Ալեքսեյ Ուստիմչուկինը և Սերգեյ Գրոմովինը՝ մինչև հոկտեմբերի 25-ը:

«Կասպերսկու լաբորատորիա» ընկերության գլխավոր տնօրենի որդին՝ 20-ամյա Իվան Կասպերսկին, ում առևանգել էին ապրիլի 19-ին, ազատ է արձակվել ապրիլի 24-ին՝ մերձմոսկովյան շրջանում անցկացված հատուկ օպերացիայի արդյունքում: Իրավապահ մարմինները տեղեկացրել են առևանգման հինգ կասկածյալների ձերբակալության մասին:

Առևանգումը կազմակերպելու մեջ կասկածվողի կինը՝ Լյուդմիլա Սավելևան, ձերբակալվել էր ապրիլի 26-ին, սակայն հետաքննությունն ապացույցներ չի գտել հանցագործության մեջ նրա ներգրավվածության վերաբերյալ և մայիսի 4-ին նրան ազատ են արձակել: -0-