ՀՀ ՊՆ-ն դեռևս ձեռնպահ է մնում Ռուսաստանի կողմից Ադրբեջանին ուղղաթիռներ վաճառելու մասին տեղեկատվությունը մեկնաբանելուց. Ռադիոմոնիտորինգ

ՀՀ Պաշտպանության նախարարությունը դեռևս ձեռնպահ է մնում «Ռոսվերտոլ» ռուսական ընկերության կողմից Ադրբեջանին 24 միավոր Մի-35Մ ռազմական ուղղաթիռների վաճառքի մասին տեղեկատվությունը մեկնաբանելուց:

ԼՂՀ նախագահի մամուլի խոսնակ, քաղաքագետ Դավիթ Բաբայանը «Ազատություն» ռադիոկայանի հետ զրույցում նշել է, որ չի կարծում, թե սա յուրահատուկ ուղերձ է Հայաստանին: Բաբայանի խոսքերով՝ այս դեպքում տնտեսական գործոնն է գերակա գտնվել: Նա կարծում է, որ այս զինամթերքը վաճառելուց հետո գործարքը չի ավարտվում. գոյություն ունի ուղղաթիռների պահպանման, տեխնիկական սպասարկման խնդիրը: Սրանով Ադրբեջանը ավելի է սերտացնում համագործակցությունը Ռուսաստանի ռազմարդյունաբերական համալիրի հետ, ինչը նաև Ռուսաստանին ձեռնտու է այդ պետությունում իր դիրքերը ամրապնդելու տեսանկյունից: «Ռուսաստանը, լինելով Մինսկի խմբի համանախագահող երկիր, հաշվի է առնում բոլոր նրբությունները, որ նման գործարքը կարող է Ադրբեջանի կողմից հետագայում օգտագործվել, ասենք, ապակայունացման համար: Հետևաբար, իմ կարծիքով, նաև այս գործարքից հետո կամ նույնիսկ առաջ նախանշվել են մի շարք պայմաններ, որ Ադրբեջանը պետք է անպայման հաշվի առնի»:

Ռազմական փորձագետ Ռուբեն Մեհրաբյանի կարծիքով՝ ուղղաթիռների գնման գործարքը ևս մեկ վկայությունն է այն փաստի, որ Հայաստանը ամենևին էլ Ռուսաստանի ռազմավարական գործընկերը չէ: «Ռուսաստանի դաշնակիցներն են միայն իր բանակը և նավատորմը, ինչպես Ալեքսանդր 3-րդի ժամանակ, ուղղակի 21-րդ դարում՝ նաև սեփական գրպանը»:

«Ազատություն» ռադիոկայան