Խարկովի քաղաքապետի թեկնածու Արսեն Ավակովը ձայների վերահաշվարկ է պահանջում 56 ընտրատեղամասերում
«Բատկիվշչինա» ընդդիմադիր կուսակցությունից Խարկովի քաղաքապետի թեկնածու Արսեն Ավակովի իրավաբանները բողոք են ներկայացրել Խարկովի վերաքննիչ վարչական դատարան՝ քաղաքապետի ընտրությունների 56 ընտրատեղամասերում ձայների վերահաշվարկ անցացնելու պահանջով, տեղեկացնում է «ՌԻԱ Նովոստին»՝ հղում անելով «Բատկիվշչինայի» մամուլի ծառայությանը։
Տեղական խորհուրդների ընտրությունները տեղի են ունեցել Ուկրաինայում հոկտեմբերի 31-ին։ Քաղաքապետի պաշտոնի համար պայքարող գլխավոր մրցակիցներն են եղել Արսեն Ավակովը «Բատկիվշչինայից» և Գենադի Կերնեսը իշխող Ռեգիոնների կուսակցությունից։ «Բատկիվշչինայի» ներկայացուցիչները դեռ ընտրությունների օրը հայտարարել են, որ չեն կասկածում իրենց թեկնածուի հաղթանակին։ Կերնեսը հավաքել է ձայների 30,09 տոկոսը, իսկ Ավակովը՝ 29,46 տոկոսը։
Խարկովի քաղաքային ընտրական հանձնաժողովի դեմ խարկովյան քաղաքապետի ընտրությունների ոչ պատշաճ կազմակերպման և անգործության վերաբերյալ հայցն արդեն ներկայացվել է։ Ավակովի ներկայացուցիչները պահանջել են քաղաքային ընտրական հանձնաժողովից 56 տեղամասերում ձայների վերահաշվարկ անցկացնել։ Օկրուգի վարչական դատարանը մերժել է թեկնածուի հայցը՝ ասելով, թե հայցի ապացուցողական բազան հիմնավորված չի եղել։ Ներկայումս այդ որոշումը բողոքարկվել է։
Ինքը՝ Ավակովը հայտարարել է, թե Խարկովի ընտրությունները կեղծվել են։
Բողոքարկման քննարկման ամսաթիվն առայժմ հայտնի չէ։ -0-
