Ռոստովի քահանայի ընտանիքում ծնվել է 18-րդ երեխան

Ռոստովի մարզի Սերաֆիմ Սորովսկու և Սուրբ երրորդության տաճարների սպասավոր, Հովհաննես քահանա Օսյակի՝ Ռոստովի մարզի ամենաբազմազավակ ընտանիքում ծնվել է 18-րդ երեխան, երեքշաբթի տեղեկացնում է «ՌԻԱ Նովոստին»։ 

«Մենք աղջիկ ենք ունեցել և նրան անվանել ենք Անաստասիա։ Կինս երեխայի հետ դեռ մոտ երկու շաբաթ հիվանդանոցում կլինի, բայց արդեն ամեն ինչ լավ է, և մենք սպասում ենք նրանց տանը»,- ասաց Օսյակը։

Նա պարզաբանեց, որ այժմ իրենց մեծ ընտանիքում տասն աղջիկ են և ութ տղա։ Ամենաավագը 25 տարեկան է, իսկ 17-րդ երեխան՝ Քսենյան՝ մեկ տարեկան։ Ինքը՝ քահանան իր ընտանիքում տասներորդ երեխան է, երեցկինը՝ հինգերորդը։

Այս տարեսկզբին Ռուսաստանի նախագահ Դմիտրի Մեդվեդևը Օսյակի ընտանիքին ու ևս յոթ բազմազավակ ընտանիքների հանձնեց «Ծնողական փառքի» շքանշաններ, որոնք շնորհվում են ընտանիքի ինստիտուտի ամրապնդման և երեխաների դաստիարակության գործում ունեցած վաստակի համար։ -0-