ԵՐԵՎԱՆ, 30 հունվարի. /Նովոստի-Արմենիա/. ՀԱՊԿ մասնակից-երկրների ուժային գերատեսչությունների ներկայացուցիչները չորեքշաբթի Մոսկվայում կանցկացնեն տեղեկատվական տեխնոլոգիաների բնագավառում հանցագործությունների դեմ պայքարի հարցերին առնչվող խորհրդակցություններ, «ՌԻԱ Նովոստիին» են տեղեկացրել կազմակերպութան քարտուղարությունից։
«Մենք կառաջարկենք փորձագետներին աշխատանքային փորձի և համագործակցության արդյունքների փոխանակում կատարել, նաև քննարկել պրակտիկ միջոցները, որոնք հնարավոր է և անհրաժեշտ է սկսել իրականացնել մեր կազմակերպության ձևաչափում», - քարտուղարությունից մեջբերել են ՀԱՊԿ գլխավոր քարտուղար Սերգեյ Բորդյուժայի խոսքերը։
Նրա խոսքերով, տեղեկատվական տեխնոլոգիաների բնագավառում հանցագործությունների կանխարգելումն ու բացահայտումը սերտորն կապված է ահաբեկչության հակազդման և անվտանգության ապահովման այլ ուղղությունների հետ։
Խորհրդակցությունների շրջանակներում կքննարկվեն «Տեղեկատվական անվտանգության համակարգի ձևավորման նպակատով համատեղ գործողությունների ծրագրի» իրականացմանն առնչվող հարցեր, ինչպես նաև կիբեռհանցագործությունների կանխարգելմանը և բացահայտմանն ուղղված մի շարք այլ համատեղ միջոցներ։
ՀԱՊԿ գլխավոր քարտուղարը կարծում է, որ տեղեկատվական տեխնոլոգիաների բնագավառում հանցագործությունների դեմ պայքարին առնչվող հարցերի լուծումը «հնարավոր է միայն ՀԱՊԿ բոլոր անդամ-երկրների իրավապահ մարմինների և հատուկ ծառայություների համատեղ ջանքերի շնորհիվ»։
ՀԱՊԿ անդամներն են՝ Հայաստանը, Բելառուսը, Ղազախստանը, Ղրղստանը, Ռուսաստանը, Տաջիկստանը և Ուզբեկստանը։-0-
