Դաշնության խորհրդի նախագահ, «Սպրավեդլիվայա Ռոսսիա» կուսակցության ղեկավար Սերգեյ Միրոնովը աջակցում է առաջին փոխվարչապետ Դմիտրի Մեդվեդևի առաջարկն այն մասին, որպեսզի Վլադիմիր Պուտինը ղեկավարի կառավարությունը նախագահական ընտրություններից հետո։
«Եթե Վլադիմիր Վլադիմիրովիչը հավանություն տա, դա նպատակահարմար կլինի և դրականորեն կանդրադառնա Ռուսաստանի զարգացման վրա ինչպես սոցիալ-տնտեսական ոլորտում, այնպես էլ արտաքին քաղաքականության մեջ»,-երեքշաբթի հայտարարել է Միրոնովը լրագրողներին, հաղորդում է «ՌԻԱ-Նովոստին»։
Իրավիճակի նման զարգացումն անվանելով «ոչ վատ ալգորիթմ», նա ենթադրել է, որ Վլադիմիր Պուտինի աշխատանքը կառավարության ղեկավարի պաշտոնում օգտակար կլինի ռուսական իշխանության հետագա աշխատանքների կազմակերպման տեսակետից։
«Մենք բազմիցս խոսել ենք այն մասին, որպեսզի նախագահական ընտրություններից հետո ևս շարունակվի Վլադիմիր Պուտինի ուղին, իսկ ով, եթե ոչ հենց ինքը կարող է դա անել»,-հայտարարել է Դաշնության խորհրդի նախագահը։
Նա ուշադրություն է հրավիրել այն բանին, որ նախագահական ընտրություններում Մեդվեդևի հաղթանակի դեպքում «նոր նախագահը կլինի համակիրը կառավարության ղեկավարի, որը խորապես սուզված է այն ամենի մեջ, ինչ կատարվում է երկրում վերջին ութ տարիների ընթացքում»։
Երկուշաբթի չորս կուսակցություններ՝ «Եդինայա Ռոսսիան», «Սպրավեդլիվայա Ռոսսիան», Ռուսասատանի ագրարային կուսակցությունը և «Քաղաքացիական ուժը», որոնք դեկտեմբերի 2-ի խորհրդարանական ընտրություններում ընդհանուր թվով հավաքել էին ձայների ավելի քան 75%-ը, առաջարկել են Մեդվեդևին առաջադրել որպես նախագահի թեկնածու։ ՌԴ նախագահ Վլադիմիր Պուտինն աջակցել է այդ նախաձեռնությունը։
Երեքշաբթի Մեդվեդևը խնդրել է Պուտինին դառնալ վարչապետ, եթե նա հաղթի 2008-ի մարտին կայանալիք նախագահական ընտրություններում։
Միրոնովի խոսքերով, նախագահի պաշտոնում Մեդվեդևի թեկնածության առաջադրման նախաձեռնողը եղել է «Եդինայա Ռոսսիայի» առաջնորդ Բորիս Գրիզլովը։--0--
