ԵՐԵՎԱՆ, 5 դեկտեմբերի./Նովոստի-Արմենիա/. Ռուսական տարածաշրջանային Sukhoi SuperJet-100 ինքնաթիռի համար նախատեսված SaM-146 շարժիչի թռիչքային փորձարկումները նախատեսվում է սկսել այս շաբաթ, լրագրողներին հաղորդեց «Սուխոյ» հոլդինգի գլխավոր տնօրեն Միխայիլ Պողոսյանը։
«Գրոմովի անվան ԹՀԻ-ում Ил-76ЛЛ «թռչող լաբորատորիայում» SaM-146 շարժիչի փորձարկումները կսկսվեն այս շաբաթ։ Դրանից հետո արդեն հնարավոր կլինի խոսել ռուսական տարածաշրջանային նոր Sukhoi SuperJet-100 ինքնաթիռի առաջին թռիչքի կոնկրետ ամսաթվի մասին, որն առայժմ նշանակված է 2007թ. դեկտեմբերին»,- ասաց Պողոսյանը «LIMA-2007» միջազգային ավիատիեզերական սրահում, որն աշխատելու է Լանգկավի կղզում մինչև դեկտեմբերի 8-ը։
«Սուխոյ» հոլդինգի տնօրենի խոսքով, «հսկայական աշխատանք է տարվել ինքնաթիռը ստեղծելու համար, ընդ որում՝ փորձարկումներին զուգահեռ ընթանում է նրա արտադրության մեկնարկը»։
Ինչպես նշեց հոլդինգի գլխավոր տնօրենը, Sukhoi SuperJet-100 նախագծի ուղղությամբ ձեռնարկվել են մեծածավալ ցամաքային մշակումներ, որոնք կատարվում են ոչ միայն ռուսական, այլև եվրոպական և ամերկյան հավատարմագրման պահանջներին համապատասխան։
«Սա լավ նախադրյալներ է ստեղծում, որպեսզի ինքնաթիռի հավատարմագրման գործընթացին զուգահեռ մեկնարկի նաև նրա սերիական արտադրությունը, ինչն էլ մենք մտադիր ենք իրագործել 2008 թվականին»,- ասաց Պողոսյանը։
Ռուսական տարածաշրջանային նոր Sukhoi SuperJet-100 ինքնաթիռի համար նախատեսված SaM-146 շարժիչը ստեղծվում է «Սատուրն» (Ռիբինսկ, Յարոսլավլի երկրամաս) գիտա-արտադրական միավորման և ֆրանսիական Sneсma ընկերության հետ համատեղ։
Sukhoi SuperJet-100 ինքնաթիռը պատկանում է տարածաշրջանային RRJ (Russian Regional Jet, ռուսական տարածաշրջանային ինքնաթիռ, Սուխոյ, Բոյինգ և Իլյուշին ընկերությունների նախագիծ) ինքնաթիռների ընտանիքին, որոնք ներկայացված են վեց մոդելներով՝ RRJ-60, RRJ-75, RRJ-95՝ համապատասխանաբար, 60, 75 և 95 նստատեղերով, թռիչքի սովորական և մեծացված հեռավորությամբ։
Ինքնաթիռների սերիական արտադրությունը նախատեսված է 2008 թվականին։ Այս ընտանիքի ինքնաթիռների արտադրության միջին կանխատեսումը 800-900 հատ է, իսկ լավատեսականը՝ 1200։ --0—
