ԵՐԵՎԱՆ, 5 մայիսի. /Նովոստի-Արմենիա/. ՀՀ արդարադատության նախարարությունում շարունակվում են Գյումրիում 7 մարդուց բաղկացած ընտանիքի սպանության համար դատապարտված զինծառայող Վալերի Պերմյակովի պատիժը կրելու կազմակերպման հարցի քննարկումները, հայտնում է ՀՀ արդարադատության փոխնախարար Վիգեն Քոչարյանը:
2015 թ.-ի հունվարի 12-ին Գյումրիում Ավետիսյանների ընտանիքի յոթ անդամների սպանության մեղադրանքով Պերմյակովը դատապարտվեց զմահ ազատազրկման: Վալերի Պերմյակովը 2015 թ.–ի հունվարի 13–ին ձերբակալվել է ռուս սահմանապահների կողմից` հայ–թուրքական սահմանը հատելու փորձի ժամանակ և խոստովանել է իր մեղքը։
Նախօրեին ռուսական ԶԼՄ-ները, հղում անելով Հյուսիս-Կովկասյան շրջանային ռազմական դատարանի ներկայացուցչին, հայտնել էին, որ Վալերի Պերմյակովն իր պատիժը Ռուսաստանում է կրելու:
Загружается новость ... "Лево"
«Հաշվի առնելով, որ տվյալ անձի վերաբերյալ դատական որոշումները կայացվել են և ՌԴ, և Հայաստանի դատարանների կողմից, նմանատիպ քննարկումներ, բնականաբար, տարվում են նաև Ռուսաստանի կողմից` պատիժն իրականացնելու ապահովման համար անհրաժեշտ իրավական որոշումները գտնելու նպատակով: Կայացված որոշման մասին Հայաստանի նախարարությունը լրացուցիչ կհայտնի», - մեջբերում է Քոչարյանի խոսքը գերատեսչության մամուլի ծառայությունը:
2015 թ.-ի օգոստոսի 12-ին Ռուսական կայազորային ռազմական դատարանը դատապարտեց նրան 10 տարվա ազատազրկման խիստ ռեժիմի գաղութում` դասալքության և զենքի հափշտակության համար:
2016 թվականի օգոստոսի 23–ին Հայաստանի դատարանը դատապարտել է Վ.Պերմյակովին ցմահ ազատազրկման Գյումրիում 2015 թվականի հունվարի 12–ին Ավետիսյան ընտանիքին սպանելու համար։
Ապրիլի վերջին Հայաստանի Վճռաբեկ դատարանից հաղորդել են, որ տուժած կողմի փաստաբաններին չի հաջողվել գործի վերաքննման հասնել: Տուժածների իրավահաջորդները Հայաստանի սահմանդրական դատարան բողոք էին ներկայացրել` կարծելով, որ հանցագործությունն ամբողջությամբ չի բացահայտվել, իսկ Պերմյակովը միայնակ չէր կարող գործել: Ավելի ուշ մեկ այլ բողոքով իրավահաջորդները պահանջում էին 450 հազար եվրոյի չափով նյութական վնասի հատուցում: Սակայն երկու բողոքներն էլ մերժվել էին: -0-
