Հրապարակվել են Հայաստանում նոր կենսաչափական անձնագրեր տրամադրող 14 գրասենյակների հասցեները (ՎԻԴԵՈ)
ԵՐԵՎԱՆ, 5 հոկտեմբերի․ /Նովոստի-Արմենիա/․ Նոյեմբերի 1-ից անձը հաստատող փաստաթղթերի տրամադրման համակարգը կգործի նոր ձևաչափով։
Ինչպես հայտնում է ՆԳՆ հանրային հաղորդակցության և իրազեկման վարչությունը, կենսաչափական նոր ծառայությունները կմատուցվեն մասնավոր գործընկերոջ կողմից՝ ժամանակակից, բարեկարգ և քաղաքացիների հարմարավետ սպասարկման համար նախատեսված գրասենյակներում։
Սպասարկման նոր գրասենյակները կգործեն 14 հասցեում․
ԵՐԵՎԱՆ
• «Երևան Մոլ»՝ Արշակունյաց պողոտա, 34/3
• «Մեգամոլ»՝ Գայի պողոտա, 16
ԱՐԱՐԱՏԻ ՄԱՐԶ
• Արտաշատ՝ Օգոստոսի 23-ի փողոց, 79/8
ՎԱՅՈՑ ՁՈՐԻ ՄԱՐԶ
• Եղեգնաձոր՝ Կամոյի փողոց, 11/1
ՍՅՈՒՆԻՔԻ ՄԱՐԶ
• Կապան՝ Ա. Մանուկյան փողոց, 3/41
ԱՐՄԱՎԻՐԻ ՄԱՐԶ
• Վաղարշապատ՝ Վ․ Սարգսյան փողոց, 111/1
ԱՐԱԳԱԾՈՏՆԻ ՄԱՐԶ
• Աշտարակ՝ Վ. Պետրոսյան փողոց, 51/1
ԿՈՏԱՅՔԻ ՄԱՐԶ
• Աբովյան՝ Է. Պետրոսյան փողոց, 4/7, 62
• Հրազդան՝ Զորավար Անդրանիկի պողոտա, 3 (Հայփոստ)
ՇԻՐԱԿԻ ՄԱՐԶ
• Գյումրի՝ Կայարանամերձ հրապարակ, 1 («Գյումրի» կայարան)
ԼՈՌՈՒ ՄԱՐԶ
• Վանաձոր՝ Աղայան փողոց, 76/6
ՏԱՎՈՒՇԻ ՄԱՐԶ
• Իջևան՝ Անկախության փողոց, 19/79
ԳԵՂԱՐՔՈՒՆԻՔԻ ՄԱՐԶ
• Գավառ՝ Կենտրոնական հրապարակ, 1/1 (Հայփոստ)
• Մարտունի՝ Պ․ Պռոշյան փ․ 4, 12
2027 թվականի առաջին եռամսյակում նոր գրասենյակների թիվը կհասնի խոստացված 23-ին։ Գրասենյակներ կգործեն․
Սյունիքի մարզում՝ Մեղրիում և Գորիսում,
Արմավիրի մարզում՝ Արմավիրում,
Տավուշի մարզում՝ Դիլիջանում և Բերդում,
Լոռու մարզում՝ Ալավերդիում և Ստեփանավանում,
Շիրակի մարզում՝ Արթիկում,
Արարատի մարզում՝ Արարատում։
Կենսաչափական համակարգի ներդրման մասին
2024 թվականի օգոստոսին ՀՀ կառավարությունը որոշում է կայացրել քաղաքացիներին նոր նմուշի նույնականացման քարտեր (ID-քարտեր) և կենսաչափական անձնագրեր տրամադրելու մասին։
Անհրաժեշտ ենթակառուցվածքի ստեղծմամբ զբաղվում է մրցույթում հաղթած ֆրանսիական IDEMIA Identity Security France և A.C.I. Technology S.à r.l. կոնսորցիումը։
2025 թվականի ապրիլին Հայաստանում համաձայնագիր է ստորագրվել այդ կոնսորցիումի կողմից ստեղծված HAYPASS ընկերության հետ, որը զբաղվում է երկրում կենսաչափական անձնագրերի և ID-քարտերի համակարգի ենթակառուցվածքի ներդրմամբ։
Կենսաչափական համակարգի ներդրումը ԵՄ հետ վիզաների ազատականացման գործողությունների ծրագրի կատարման շրջանակում իրականացվող բարեփոխումների ուղղություններից մեկն է։
