ԵՐԵՎԱՆ, 14 հոկտեմբերի. /Նովոստի–Արմենիա/. Քննարկվում է ՀՀ նախկին վարչապետ Հովիկ Աբրահամյանին ինչ-որ երկրում դեսպան նշանակելու հավանականությունը, գրում է «Հայկական ժամանակ» թերթը։
Քննարկումներն ընթանում են իշխող հանրապետական կուսակցության շրջանակներում, հատկապես, որ նման պրակտիկա հայկական իրականության մեջ արդեն կա։
Թերթը հիշեցնում է, որ երբ վարչապետի պաշտոնից հրաժարական տվեց Տիգրան Սարգսյանը, նա նշանակվեց ԱՄՆ– ում Հայաստանի դեսպան։ Այն ժամանակ կարծիք կար, որ դա արվեց նաև այն պատճառով, որպեսզի Տիգրան Սարգսյանը Հայաստանում չլինի և իր ներկայությամբ չխանգարի Հովիկ Աբրահամյանին։
Հիմա, ինչպես գրում է պարբերականը, որոշ տեղեկությունների համաձայն իշխանական վերնախավում քննարկում է, որ Հովիկ Աբրահամյանին նույն պատճառներով Կարեն Կարապետյանին չխանգարելու համար, որևէ հարմար երկիր դեսպան ուղարկեն։
«Տիգրան Սարգսյանի ունակություններն ու հնարավորությունները այն ժամանակ մեզ շատ անհրաժեշտ էին ԱՄՆ-ում։ Իսկ Հովիկ Աբրահամյանն առայժմ հանգստանում է, և նրա հետագա աշխատանքի վերաբերյալ դեռ որևէ քննարկում չի եղել»,– շրջանառվող տեղեկություններն այսպես է մեկնաբանել ԱԺ ՀՀԿ խմբակցության ղեկավար Վահրամ Բաղդասարյանը»,– գրում է թերթը։ -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում