ՀՀ նախագահը խնդրել է լրագրողներին մոռանալ վերջին օրերի իրադարձությունների մասին

ԵՐԵՎԱՆ, 1 օգոստոսի. /Նովոստի-Արմենիա/. Հայաստանի նախագահ Սերժ Սարգսյանն առանձին շնորհակալություն է հայտնել լրագրողներին` ՊՊԾ գնդի գրավման իրադարձությունները բարձր մակարդակով լուսաբանելու համար։

Այս մասին նա ասել է հասարակության, իշխանությունների և հոգևոր դասի ներկայացուցիչների հետ հանդիպման ժամանակ ուղղած իր խոսքում։

Նախագահը, մասնավորապես, շնորհակալություն է հայտնել լրագրողներին իրենց անմնացորդ աշխատանքի համար և անարյուն հանգուցալուծմանը նպաստելու համար, ինչպես նաև ներողություն է խնդրել նրանցից հուլիսի 29-ի՝ լույս 30-ի գիշերվա դեպքերի համար։

Նա այդ դեպքերն անվանել է իշխանությունների ամենաէական բացթողումն այս օրերի ընթացքում, հավաստիացնելով, որ այդ ամենից հետևություններն արվելու են։

Նախագահը խնդրել է միայն լրագրողներին, բայց ոչ իրավապահներին, մոռանալ այդ դեպքերի մասին, վստահեցնելով, որ նման բան այլևս չի կրկնվի։ Սարգսյանը նաև իր ցանկությունն է հայտնել, որ այդ դեպքերն այսուհետ անգամ ենթագիտակցական որևէ ազդեցություն չունենան լրագրողների ազատ գործելաոճի վրա:

Ընդդիմադիր Ժիրայր Սեֆիլյանի զինված կողմնակիցները հուլիսի 17–ին մուտք են գործել ՊՊԾ գնդի տարածք։ Նրանք պահանջում էին ազատ արձակել Ժիրայր Սեֆիլյանին, ով կալանավորվել էր շուրջ մեկ ամիս առաջ մի խումբ անձանց կողմից զենք ապօրինի պահելու կասկածանքով։

Հուլիսի 31-ին զինված խումբը զենքը վայր է դրել և հանձնվել իշխանություններին: Այս ընթացքում զոհվել են ոստիկանության երկու աշխատակից: Զինված խմբի անդամների և իրավապահ մարմինների աշխատակիցների շրջանում կան վիրավորներ: -0-