Հայրենիքը մեր աչքերի առաջ փոքրանում է․ քաղաքացին Փաշինյանին ասել է, որ ուրախանալու առիթ չկա
ԵՐԵՎԱՆ, 11 մայիսի․/Նովոստի–Արմենիա/․ Երևանում նախընտրական քարոզարշավի ժամանակ ՀՀ վարչապետ Նիկոլ Փաշինյանը քաղաքացուց հարցրեց, թե ինչու է նա վատ տրամադրությամբ։ Վերջինս պատասխանեց, որ այլ տրամադրության համար առիթ չկա:
Որպես առիթ վարչապետը թվարկեց կենսաթոշակների բարձրացումը, առողջության համընդհանուր ապահովագրության համակարգի ներդրումը, նոր դպրոցների և մանկապարտեզների կառուցումը, հաստատված խաղաղությունը և տնտեսական աճը։
«Էդ սաղ մի հատ հայրենիք չարժի հա՞», - նշեց քաղաքացին՝ ընդգծելով, որ այն մեր աչքի առաջ փոքրանում է։
Փաշինյանը չհամաձայնեց։
«ՀՀ-ն ինչքան եղել է իր միջազգայնորեն ճանաչված տարածքով, հիմա այդքան էլ կա, և սահմանազատման արդյունքում բոլոր այն հատվածներում, որոնց հետ խնդիր կա, այդ բոլոր հատվածներում հարցերը կլուծվեն», - ասաց վարչապետը՝ անդրադառնալով Ադրբեջանի հետ պետական սահմանի սահմանազատման գործընթացին։
Զրույցից հետո քաղաքացին չընդունեց վարչապետի՝ Հայաստանի քարտեզով կրծքանշանը կամ թռուցիկը, սակայն սեղմեց նրա ձեռքը։
