ԵՐԵՎԱՆ, 2 մայիսի. /Նովոստի-Արմենիա/. Հայաստանը չի կարող արգելել ադրբեջանական կամ թուրքական արտադրանքի ներկրումը, երեքշաբթի լրագրողներին ասաց «Սպառողների խորհրդատվության կենտրոնի» նախագահ, Հայաստանի գյուղատնտեսական ալյանսի անդամ Կարեն Չիլինգարյանը:
Սննդի անվտանգության պետական ծառայությունն ապրիլի 23-ից սկսած երեք օր զանգվածային ստուգումներ էր իրականացնում շուկայում` ԶԼՄ-ում հայտնված տեղեկատվությունը ստուգելու համար, որի համաձայն, երկրում իրացվում են ադրբեջանական խնձորներ: Ստուգման արդյունքների համաձայն, կարգավորիչը գրանցել է այդ երկրի խնձորների իրացման դեպքեր: Ստուգումներն իրականացվել են բանջարեղենի և մրգերի վաճառակետերում, Երևանի և մարզերի սուպերմարկետներում և շուկաներում:
«Հայաստանն Առևտրի համաշխարհային կազմակերպության անդամ է և չի կարող որևէ երկրից արտադրանքի ներկրման արգելքի մասին հայտարարությամբ հանդես գալ, նույնիսկ եթե մենք թշնամիներ ենք: Մենք կարող ենք արգելք դնել միայն խախտումների կամ սանիտարական նորմերի անհամապատասխանության դեպքում, հակառակ դեպքում Հայաստանը բարդ իրավիճակում կհայտնվի», - ասաց Չիլինգարյանը:
Փորձագետի խոսքով, այս իրավիճակում լիազոր մարմիններն ուղղակի պետք է բացառեն նմանատիպ արտադրանքի մաքսանենգության հնարավորությունները, ինչպես նաև ներկրման ժամանակ հնարավոր կոռուպցիոն ռիսկերը:
«Մեր գնահատականով, ներկրվել է շուրջ տասը տոննա, ինչը վկայում է, որ ներկրումն իրականացվել է անօրինական ճանապարհով», - ասաց Չիլինգարյանը` ավելացնելով, որ դա այս կամ այն արտադրանքի անօրինական ներկրման եզակի դեպքը չէ:
Ինչ վերաբերում է արտադրանքի ոչնչացման հարցին, ապա, նրա կարծիքով, նման մոտեցումն անընդունելի է, քանի որ եթե արտադրանքը համապատասխանում է սանիտարական նորմերին, ապա այն կարելի է վերամշակել:
Միաժամանակ, նա նշեց, որ անձամբ ինքը նման արտադրանք չէր գնի: -0-
Ծանոթացեք լուրերին առաջինն ու քննարկեք դրանք մեր Telegram-յան ալիքում