«Բացահայտ կեղծիք». Մայր Աթոռը Հաջիևին մեղադրել է Արցախի Գանձասարի և Դադիվանքի՝ հայկական պատկանելության խեղաթյուրման մեջ
ԵՐԵՎԱՆ, սեպտեմբերի 15 /Նովոստի-Արմենիա/. Մայր Աթոռ Սուրբ Էջմիածինը «բացահայտ կեղծիք» է որակել Ադրբեջանի նախագահի օգնական Հիքմեթ Հաջիևի հայտարարությունները, որոնցով հերքվում է Արցախի Գանձասար և Դադիվանք վանական համալիրների հայկական պատկանելությունը, և դրանք ներկայացվում են որպես աղվանական։
Հաջիևն այդ հայտարարություններն արել է վանական համալիրներ կատարած վերջին այցի ժամանակ։
« Պատմական իրողությունների՝ քաղաքական նպատակահարմարությամբ խեղաթյուրման այս փորձերը բացահայտ կեղծարարություն են և ոտնձգություն հայ ժողովրդի պատմական հիշողության ու հոգևոր ժառանգության հանդեպ», - ասվում է Մայր Աթոռ Սուրբ Էջմիածնի հայտարարության մեջ։
Սուրբ Էջմիածնում տեղի ունեցածը նաև որակել են որպես Ադրբեջանի իշխանությունների վարած «հայատյաց քաղաքականության» դրսևորում, իսկ Հաջիևի այցը՝ «քարոզչական», որը, Հայ Առաքելական Եկեղեցու գնահատմամբ, ուղղված է միջազգային հանրությանը մոլորեցմանը։
Հատուկ մտահոգություն են հայտնել Մայր Աթոռում՝ Ադրբեջանում հավատարմագրված օտարերկրյա դիվանագետների և միջազգային կառույցների ներկայացուցիչների՝ նման այցերին մասնակցելու կապակցությամբ։
Մայր Աթոռ Սուրբ Էջմիածինն ակնկալում է, որ վերջիններս պատշաճ գնահատական կտան հայկական սրբավայրերի ինքնության խեղաթյուրմանը, Արցախի հոգևոր-մշակութային ժառանգության նկատմամբ ոտնձգություններին, հայատյաց քաղաքականությանը և իրենց մասնակցությամբ չեն նպաստի հայկական պատմական ժառանգության յուրացման քաղաքականության արդարացմանը։
Հայ Առաքելական Եկեղեցին հայտարարել է, որ Արցախի բռնի հայաթափումից հետո ադրբեջանական իշխանությունների կողմից վարվում է պատմական հուշարձանների յուրացման, հայկական սրբավայրերի, խաչքարերի ու գերեզմանոցների ոչնչացման, ինքնությունը փաստող վավերագրերի վերացման քաղաքականություն, որի հերթական դրսևորումն են Հաջիևի հայտարարությունները։
Մայր Աթոռ Սուրբ Էջմիածինը կոչ է արել Հայաստանի իշխանություններին պատշաճ գնահատական տալ իրավիճակին և գործուն քայլեր ձեռնարկել Արցախի հայկական հոգևոր-մշակութային ժառանգության նկատմամբ ոտնձգությունները կանխելու համար։
Եկեղեցին նաև դիմել է բարեկամ պետություններին, միջազգային պատկան և ազգային կառույցներին ամենայն ջանք ի գործ դնել կանխելու քրիստոնեական հնագույն հայկական ժառանգության հետագա ոչնչացումն ու յուրացումը։
«Տարածաշրջանում հարատև խաղաղության հաստատումը պահանջում է հարգանք ժողովուրդների հավատքի, պատմական հիշողության և հիմնարար իրավունքների նկատմամբ։ Արցախի հոգևոր ժառանգության անխաթար պահպանությունը, այն կերտած Հայոց Եկեղեցու և ժողովրդի իրավունքների իրացումը միջազգային անօտարելի պարտավորություն է», - ասվում է հայտարարության մեջ։
Արցախում ադրբեջանական կեղծիքների մասին
2026 թվականի սեպտեմբերի 11–12-ին Ադրբեջանում հավատարմագրված դիվանագիտական կորպուսի, ինչպես նաև միջազգային կազմակերպությունների ներկայացուցիչները այցելել են Ղարաբաղ։ Այցելած օբյեկտների թվում են եղել հայկական Գանձասար և Դադիվանք վանական համալիրները։ Պատվիրակությանն ուղեկցել է Ադրբեջանի նախագահի օգնական Հիքմեթ Հաջիևը, ով հայտարարել է, որ Գանձասարն ու Դադիվանքը «հնագույն աղվանական քրիստոնեական ժառանգության» մաս են կազմում։
Երևանի արձագանքը
Սեպտեմբերի 14-ին Հայաստանի Ազգային ժողովի նախագահի տեղակալ Ռուբեն Ռուբինյանն անհիմն և խաղաղությանը չնպաստող է որակել Ղարաբաղի «աղվանական» ժառանգության մասին Բաքվի հայտարարությունները։
ԵՄ հատուկ ներկայացուցչի մեկնաբանությունը
Ղարաբաղ կատարած այցին մասնակցել է նաև Հարավային Կովկասում ԵՄ հատուկ ներկայացուցիչ Մագդալենա Գրոնոն։ Այցից հետո նա մեկնաբանել է Հայաստանում իր հասցեին հնչած քննադատությունը և Երևան ժամանելիս հայտարարել, որ «չի վիճարկում հայկական ներկայությունը և հարուստ հայկական ժառանգությունը հակամարտությունից տուժած Ղարաբաղի շրջաններում»։
Հայաստանի մայրաքաղաքում Գրոնոն այցելել է նաև Մատենադարան, որտեղ նրան ներկայացրել են հայերեն ձեռագրերի հավաքածուն, պատմել դրանց պատմության, հնագույն ձեռագրերի պահպանման և մշակման ավանդույթների, ինչպես նաև հայկական և համաշխարհային մշակութային ժառանգության պահպանման գործում Հայաստանի ունեցած ներդրման մասին։
