Արյունոտ միջադեպ Շամիրամում. Արագածոտնի մարզպետարանը սպասում է նախաքննության արդյունքներին

ԵՐԵՎԱՆ, 1 օգոստոսի. /Նովոստի–Արմենիա/. Արագածոտնի մարզպետարանը սպասում է Շամիրամ գյուղի գերեզմանատանը տեղի ունեցած հրաձգության գործով նախաքննության արդյունքներին։

Այդ մասին «Նովոստի–Արմենիա» գործակալությանը հայտնեց մարզպետարանի տեղեկատվության և հասարակայնության հետ կապերի բաժնի պետ Սաթենիկ Զորյանը։
«Մենք առայժմ հավելյալ տեղեկության չենք տիրապետում։ Ոստիկանությունը շարունակում է աշխատանքը դեպքի վայրում, կատարվում է նախաքննություն։ Սպասում ենք պաշտոնական արդյունքների»,– ասաց Զորյանը։

Երեքշաբթի Արագածոտնի մարզի Շամիրամ գյուղի գերեզմանատան սգո արարողությունների սրահ է ներխուժել անհայտ անձը և կրակ է բացել ներկաների վրա։ Հրազենային վնասվածքներ են ստացել 7 մարդ, չորսը մահացել են, երեքը` տեղում, մեկը` հիվանդանոցի ճանապարհին։
Զորյանը նշեց, որ չի կարող հաստատել կամ հերքել հայկական ԶԼՄ–ներում հայտնված տեղեկությունը միջադեպի պատճառների և մանրամասների վերաբերյալ։


«Արագածոտնի մարզպետն այցելել է Աշտարակի բժշկական կենտրոնում գտնվող տուժածներին։ Հրազենային վնասվածքներ ստացածներից երեքը տեղափոխվել են Երևան»,– ասաց մարզպետարանի ներկայացուցիչը։

Ինչպես ավելի վաղ հայտնել էր Հայաստանի առողջապահության նախարարությունը, հղում անելով մարզպետարանի առողջապահության և սոցիալական անվտանգության վարչության ղեկավար Արմեն Պետրոսյանին, առավել ծանր վիճակում գտնվող չորս տուժածները տեղափոխվել են Երևանի «Արմենիա» և «Աստղիկ» կենտրոններ։

Մնացած երեքը շարունակում են բուժօգնություն ստանալ Աշտարակում։ Բժիշկները նրանց վիճակը գնահատում են միջին ծանրության։ Կյանքին վտանգ չի սպառնում։
«Աստղիկ» ԲԿ–ից հայտնեցին, որ երկու տուժածների վիճակը գնահատվում է միջին ծանրության, մյուսինը` ծանր։ Վիրավորներից մեկի կյանքը չհաջողվեց փրկել` նա մահացավ «Արմենիա» ԲԿ–ում վիրահատության ժամանակ։ -0-