Քոչարյանը դատարանում հերքեց բոլոր մեղադրանքները, խափանման միջոցի հարցի քննությունը կրկին հետաձգվեց

ԵՐԵՎԱՆ, 1 փետրվարի. /Նովոստի–Արմենիա/. ՀՀ վերաքննիչ քրեական դատարանն ուրբաթ հետաձգել է ՀՀ նախկին նախագահ Ռոբերտ Քոչարյանի փաստաբանների բողոքը երկու ամսով կալանքը երկարացնելու դեմ։

Երևանի ընդհանուր իրավասության դատարանը հունվարի 18–ին որոշեց երկու ամսով երկարացնել ՀՀ նախկին նախագահ Ռոբերտ Քոչարյանի կալանքը։ Միաժամանակ, Քոչարյանի փաստաբանների`գրավով ազատ արձակելու միջնորդությունը մերժվեց։ Հունվարի 29–ին Քոչարյանի պաշտպանները բողոքով դիմեցին ՀՀ վերաքննիչ քրեական դատարան խափանման միջոցի մասին որոշումը վերանայելու մասին։

«Պաշտպանությունն ամբողջությամբ ներկայացրեց իր բողոքը։ Ելույթ է ունեցել նաև Քոչարյանը։ Մենք ներկայացրել ենք մեր առարկությունները, սակայն մեր դիրքորոշումն ամբողջությամբ չհասցրեցինք ներկայացնել աշխատանքային օրվա ավարտի պատճառով», – ասաց դատախազ Վահագն Մուրադյանը` նշելով, որ Քոչարյանի գործով դատական նիստը հետաձգվել է փետրվարի 4–ին, ժամը 12։00–ին։

Նա նաև ընդգծեց, որ մեղադրող կողմը պնդում է, որ Քոչարյանի խափանման միջոցի փոփոխությունն անթույլատրելի է և նրա կալանքը 2 ամսով հետաձգելն օրինական է։

Քոչարյանի փաստաբան Հայկ Ալումյանն իր հերթին ներկայացրեց Վերաքննիչ դատարանում Քոչարյանի ելույթի մանրամասները` նշելով, որ նրա ելույթը տևել է մոտ երկու ժամ։

«Քոչարյանը ներկայացրեց իրավիճակը` սկսած 2008թ.–ի փետրվարի 23–ից։ Մասնավորապես, նա նշեց տեղեկատվության առկայությունն այն մասին, որ Զինված ուժերում աշխատանք է ընթացել հանրահավաքներում զինվորականներին ներգրավելու ուղղությամբ, ինչպես նաև այն, որ պաշտպանության նախարարի տեղակալները և «Երկրապահ կամավորների միության» նախագահի (Մանվել Գրիգորյան, խմբգր.) ևս հակված էին դրան», – ասաց Ալումյանը։

Նրա խոսքով, հիմնելով այս տեղեկատվության վրա` Քոչարյանը ցուցում է տվել ՀՀ պաշտպանության նախարարին (Միքայել Հարությունյան, խմբգր.) ապահովել բանակի չեզոքությունը։

«Ցուցումը տրվել է բանավոր։ Միաժամանակ նշվել է, որ բանակի այն բարձրաստիճան անձինք, ովքեր պատրաստվում են շարունակել ծառայությունը, պետք է հեռու մնան այդ գործընթացներից», – ասաց նա։

Ինչպես տեղեկացրեց Ալումյանը, Քոչարյանը նաև ընդգծել է, որ 2008թ.–ի 0038 գաղտնի հրամանում որևէ անօրինական բան չի եղել։ Փաստաբանը նաև նշել է, որ 0038 դիրեկտիվում չի կարող լինել որևէ ցուցում, որը կարող էր առիթ տալ անօրինական համարել նաև պաշտպանության նախարարի գործողությունները։