ԵՐԵՎԱՆ, 17 հուլիսի./Նովոստի–Արմենիա/. Նախօրեին կառավարության շենքի մոտ բողոքի ցույցի դուրս եկած քաղցրաշենցիների հետ հանդիպել է Ջրային կոմիտեի փոխնախագահ Հարություն Գուլյանը, լսել նրանց դժգոհությունները, ապա և միասին մեկնել Քաղցրաշեն՝ տեղում խնդիրները բոլոր կողմերից դիտարկելու և օպտիմալ լուծումներ գտնելու նպատակով, նշվում է Ջրային կոմիտեի Facebook–յան էջում։
«Երկխոսությունն ու այցն արդյունավետ էին, քանի որ տեղում լուծում է տրվել հնարավոր բոլոր խնդիրներին՝ կապված ոռոգման ջրի մատակարարման հետ։ Արտաշատ ՋՕԸ-ի ղեկավարությանը հանձնարարվել է ոռոգման թեժ շրջանում ավելի ճկուն գործել և միշտ պահպանել արդար բաշխման սկզբունքը։ Տիղմից ու ջրաբերուկներից ջուրն ազատելու համար էլ հանձնարարվել է լրացուցիչ ցանցեր դնել, որպեսզի աղբը չխցանի ջրանցքներն ու առուները», – նշվում է հաղորդագրության մեջ։
Տեղում որոշում է կայացվել նաև եկող տարվա հիմնանորոգումների ծրագրում ընդգրկել նախագիծ, որով պոմպակայանից դուրս եկող երկրորդ խողովակաշարը կկառուցվի՝ 800 մետր երկարությամբ, որպեսզի ջրատվությունն ավելանա։
Ջրային կոմիտեից նաև հայտնում են, որ կայացած երկխոսության ու փոխըմբռնման մթնոլորտում Քաղցրաշեն համայնքի բնակիչներն իրենց հերթին խոստացել են պայմանագրեր կնքել և ժամանակին վճարել ստացած ջրի դիմաց։ Հարություն Գուլյանը քաղցրաշենցիներին հորդորել է ոռոգման հետ կապված ցանկացած հարցով դիմել ուղիղ Ջրային կոմիտեին և անձամբ իրեն։
Հիշեցնենք, որ նախօրեին Քաղցրաշեն գյուղի բնակիչներն ակցիա էին կազմակերպել կառավարության շենքի առաջ` պահանջելով ոռոգման ջրի ապահովմանն ուղղված միջոցներ ձեռնարկել։ Գյուղացիների խոսքով, գյուղում կա երեք պոմպակայան, սակայն դրանք թերի են աշխատում` ապահովելով րոպեում ընդամենը 50 խորանարդ մետր ջուր, ինչը չի բավարարում ընդամենը մի քանի ընտանիքների հողատարածքները ոռոգելու համար, սակայն ջրամատակարարման վճարը գանձվում է ողջ գյուղից` հաշվի չառնելով ջրի բացակայության փաստը։ Շատ գյուղացիներ հրաժարվել են երկարացնել պայմանագրերը Ջրային կոմիտեի հետ ջրի պակասի պատճառով, ինչի հետևանքով առանց ոռոգման կարող է մնալ ողջ գյուղը։–0–
