Հայաստանը չի վարում բանակցություններ միջանցքի մասին, բայց պատրաստ է բացել իր ուղիներն Ադրբեջանի և Թուրքիայի միջև փոխադրումների համար.ԱԽ քարտուղար

ԵՐԵՎԱՆ, 14 հոկտեմբերի./Նովոստի–Արմենիա/. Հայաստանը երբեք չի վարել և չի վարի բանակցություններ իր տարածքով ստեղծվող միջանցքի մասին, հայտարարել է ՀՀ ԱԽ քարտուղար Արմեն Գրիգորյանը Երևանում իրանական Tasnim գործակալությանը տված հարցազրույցում։

«Ուզում եմ պարզաբանել, որ Հայաստանը երբեք չի առաջարկել և չի առաջարկի որևէ բան միջանցքի մասին, և նա երբեք չի վարել և չի վարի բանակցություններ միջացքի մասին», – ընդգծել է Գրիգորյանը։

Գրիգորյանը նաև նշել է, որ տարածաշրջանի ճանապարհների և տնտեսական ուղիների ապաարգելափակման հարցը նշված է նոյեմբերի հայտարարության մեջ (որը ստորագրվել է Հայաստանի, Ռուսաստանի և Ադրբեջանի առաջնորդների միջև, խմբգր.), այն նաև քննարկվել է հունվարի 11–ին Ռուսաստանում կայացած Հայաստանի, Ռուսաստանի և Ադրբեջանի առաջնորդների եռակողմ հանդիպման ժամանակ։

«Ուզում եմ վստահաբար ընդգծել, որ ոչ այդ երկու հայտարարություններում, ոչ էլ այդ հանդիպման ժամանակ չի հիշատակվել միջանցքի մասին», – նշել է Գրիգորյանն` ավելացնելով, որ Ադրբեջանը հակառակը մի քանի անգամ հայտարարել է, որ միջանցքի ստեղծումը քննարկվել է։

Գրիգորյանը նաև նշել է, որ վերահաստատել է այս հարցի շուրջ Երևանի դիրքորոշումը իր գործընկերների հետ հանդիպման ժամանակ։

«ՀՀ վարչապետ Նիկոլ Փաշինյանը ընտրություններից առաջ և ընտրարշավի ժամանակ պարզաբանել է, որ միջանցքի ստեղծման մասին խոսք լինել չի կարող», – ավելացրել է Գրիգորյանը։

«Դուք գիտեք, որ մենք ձայների մեծամասնությամբ հաղթեցինք վերջին ընտրությունների ժամանակ։ Դա վկայում է այն մասին, որ հայ հասարակությունն ընդունել և ըմբռնել է մեր դիրքորոշումն ու քաղաքականությունը, և նրանք (մարդիկ) աջակցում են մեր դիրքորոշմանը։ Նրանք ևս հասկացան, որ միջանցքի մասին որևէ խոսակցություն չկա», – ավելացրել է Գրիգորյանը։

ԱԽ քարտուղարը նաև նշել է, որ Հայաստանը պատրաստ է բացել իր ուղիները Ադրբեջանի և Թուրքիայի միջև փոխադրումների համար, բայց ընդգծել է, որ այդ ուղիներն ամբողջությամբ գտնվում են Հայաստանի Հանրապետության սուվերենության ներքո։

Ադրբեջանն ու Թուրքիան նախատեսում են ստեղծել «Զանգեզուրի միջանցքը», որը կապելու է Նախիջևանը Ադրբեջանի հիմնական մասի հետ` հատելով ՀՀ տարածքը։ Այստեղ նախատեսվում է կառուցել ավտոմոբիլային և երկաթուղային ճանապարհներ, բայց Հայաստանի իշխանություններն ամենաբարձր մակարդակում բազմիցս հայտարարել են, որ «Զանգեզուրի միջանցքի» ստեղծման մասին որևէ ծրագիր չկա և չի կարող լինել։–0–