ԵՐԵՎԱՆ, 15 հունվարի./Նովոստի–Արմենիա/. Հայաստանում նախատեսվելու է տուգանք անձնական տրանսպորտային միջոցները վարելու ժամանակ ծխելու համար, ուրբաթ ասաց ՀՀ ոստիկանապետի տեղակալ Արա Ֆիդանյանը ՀՀ ԱԺ պաշտպանության և անվտանգության հարցերի մշտական հանձնաժողովի նիստի ժամանակ, որտեղ ներկայացրեց «Վարչական իրավախախտումների մասին» օրենքում նախատեսված փոփոխությունները։
Նա նշեց, որ փոփոխություններն ուղղված են տուգանային բալերի համակարգի լիարժեք կիրառման ապահովմանը, հնարավոր խախտումների կանխարգելմանը, ինչպես նաև պատժի անխուսափելիության սկզբունքի ապահովմանը։
«Այլ փոփոխությունների հետ մեկտեղ խստացվում է վարչական պատասխանատվությունը անձնական ավտոմեքենայի վարորդի ծխելու համար», – ասաց Ֆիդանյանը։
Նա նշեց, որ ավելի վաղ գործող օրենսդրության համաձայն` նախատեսվում էր վարչական պատասխանատվություն միայն հասարակական տրանսպորտի վարորդների համար, այս դեպքում պատասխանատվություն է նախատեսվելու նաև անձնական մեքենաների վարորդների համար։
Նախատեսվում է, որ նման խախտման համար հանվելու է 1 տուգանային միավոր։
«Մենք այս միջոցը խիստ չենք համարում, քանի որ կան բազմաթիվ դեպքեր, երբ ՃՏՊ–ներ են գրանցվում վարորդի կողմից ծխելու պատճառով, ընդ որում նման ՃՏՊ–ները հաճախ կրում են ծանր հետևանքներ», – ասաց Ֆիդանյանը։
Նա նաև ընդգծեց, որ 2020թ.–ին, 2019թ.–ի համեմատ, ՃՏՊ–ների հետևանքով գրանցվել է 25–30 զոհով ավելի քիչ։
Նա նաև հիշեցրեց, որ տուգանային միավորների համակարգը դեռ լիարժեք չի կիրառվում, բացի այդ ոչ բոլոր մարզերում և ճանապարհներին են տեղադրված տեսահսկման տեսախցիկներ, որոնք թույլ են տալիս գրանցել խախտումները։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում