ԵՐԵՎԱՆ, 10 մայիսի./Նովոստի-Արմենիա/. Այսօր ամփոփվեց Հիսուս Քրիստոսի մոնումենտալ արձան-համալիրի նախաձեռնության մրցութային փուլը: Այս մասին նշվում է ԲՀԿ առաջնորդ, նախկին պատգամավոր Գագիկ Ծառուկյանի Facebook-յսն էջում:
Հիշեցնենք, որ հունվարին Ծառուկյանը
հայտնել էր, որ հայտարարվում է մրցույթ Հայաստանում Հիսուս Քրիստոսի արձանը կառուցելու համար։
«Հանձնախումբը և ժողովուրդը համակարծիք էին: Շնորհավորում եմ տաղանդավոր քանդակագործ Արմեն Սամվելյանին և շնորհակալ եմ բոլորին՝ պատասխանատու և պրոֆեսիոնալ մոտեցման համար: Ուրախ եմ, որ Փրկչի մոնումենտալ արձան-համալիր ունենալու գաղափարը համախմբել էր քանդակագործների՝ Հայաստանից, Արցախից և Սփյուռքից: Շնորհակալ եմ հանձնախմբին՝ ավելի քան 4 ամիս շարունակ սրտացավ աշխատանքի համար», - նշված է Ծառուկյանի Facebook-յան էջում:
Հաղորդագրության մեջ նաև նշվում է, որ Հայաստանը պետք է կարողանա նորովի ներկայանալ աշխարհին. մենք հին մշակույթով, հին գրականությամբ, հին պատմությամբ ազգ ենք, և աշխարհը մեզ այդպես պետք է ճանաչի։
Նշենք, որ մարտի 24-ին Մայր Աթոռ Սուրբ Էջմիածնում գումարվել էր Գերագույն հոգևոր խորհրդի հայաստանյան անդամների ժողով, որի ընթացքում, ի թիվս այլ հարցերի, քննարկվել էր տիար Գագիկ Ծառուկյանի կողմից Հայաստանում Տեր Հիսուս Քրիստոսի արձան կառուցելու նախաձեռնությունը: Նշվել է, որ Գերագույն հոգևոր խորհուրդը բարձրորեն գնահատում է տիար Գագիկ Ծառուկյանի եկեղեցաշինական անուրանալի ծառայությունները, որոնցով նա մեծապես նպաստել է Եկեղեցու հոգևոր-քարոզչական առաքելության արդյունավորմանը:Միաժամանակ Եկեղեցին
ընդունելի չի համարում մեր Տիրոջ՝ Հիսուս Քրիստոսի արձանի տեղադրումը՝ նկատի առնելով, որ այն հարիր չէ Հայ Եկեղեցու դարավոր պատկերագրական և պաշտամունքային ավանդույթին։-0-