ԱԳՆ–ի շենքի մոտ ակցիա է՝ ի աջակցություն Բաքվում կալանավորված հայ գերիների

ԵՐԵՎԱՆ, 1 նոյեմբերի․/Նովոստի–Արմենիա/․ Բաքվի բանտերում ապօրինի պահվող հայ ռազմագերիների աջակցության ակցիայի մասնակիցները ցույց են անցկացնում Հայաստանի ԱԳՆ–ի շենքի դիմաց։

Հավաքվածների ձեռքերում պաստառներ են, որոնց վրա պատկերված են Բաքվի բանտերում պահվող Արցախի ղեկավարները։ Նրանց ձեռքում են նաև պաստառներ, որոնց վրա գրված է «Կլիմայի պաշտպանությունն անհնար է առանց մարդու իրավունքների պաշտպանության»

Ինչպես հայտարարեց Արցախի խորհրդարանի նախկին պատգամավոր Մետաքսյա Հակոբյանը, սա երկրորդ նման ակցիան է, որն անցկացվում է Ադրբեջանում կայանալիք COP-29 կլիմայական գագաթնաժողովից առաջ։

«Ակցիայի նպատակն է ցույց տալ, թե ինչ է կատարվում Բաքվի բանտերում, ինչպես նաև Հայաստանի իշխանությունների ուշադրությունը հրավիրել բանտարկյալների վերադարձի թեմայի վրա։ Հայաստանի վարչապետը նախկինում բանտարկյալներին կոչ էր արել երկու ամիս սպասել։ Այդ օրվանից անցել է չորս տարի, և մինչ օրս խնդիրը չի լուծվել»,- ասաց Հակոբյանը։

Նրա խոսքով, իշխանությունները պետք է հաշվետու լինեն գերիների հարազատների առաջ, և ամեն ինչ անեն գերիներին շուտափույթ հայրենիք վերադարձնելու համար։

Ընդդիմադիր «Հայաստան» դաշինքի պատգամավոր Ասպրամ Կրպեյանը ևս մեկ պահանջ է ներկայացրել։ Նրա խոսքով, COP-29-ը պետք է անցկացվի այն երկրներում, որոնք իսկապես համապատասխանում են ժողովրդավարության բոլոր պարամետրերին, բայց ոչ Ադրբեջանում։

«Սա տոտալիտար երկիր է, որը մեկ տարի առաջ ցեղասպանական գործողություններ է կատարել Լեռնային Ղարաբաղի դեմ։ Մենք պահանջում ենք վերադարձնել բոլոր գերիներին և պահվող անձանց։ Պահանջում ենք, որպեսզի միջազգային հանրությունը անկախ հետաքննության մեխանիզմներ կիրառի Ադրբեջանի կողմից մարդու իրավունքների խախտումների բոլոր փաստերն ուսումնասիրելու համար»,- ընդգծեց Կրպեյանը։