5–12–րդ դասարանների դասագրքերի վարձավճարը կփոխհատուցվի․ աշխատող ծնողները կստանան 3000 դրամ սոցիալական կրեդիտ
ԵՐԵՎԱՆ, 21 հունվարի․/Նովոստի–Արմենիա/․ ԿԳՄՍ նախարար Ժաննա Անդրեասյանն այսօր ԱԺ–կառավարություն հարցուպատասխանի ժամանակ հայտնել է, որ եկամուտների համընդհանուր հայտարարագրման դեպքում դասագրքրի դիմաց վարձավճարները դիտարկվում են սոցիալական կրեդիտի հնարավորության ներքո։
«Սա նշանակում է, որ 5-12-րդ դասարանների սովորող յուրաքանչյուր աշխատող ծնող համապատասխան ընթացակարգով 3000 դրամ միանվագ հետ է ստանում՝ որպես դասագրքերի վարձավճարի փոխհատուցում», - ասաց Անդրեասյանը։
Նախարարը հայտնեց, որ այս ծրագրի շահառու են ավելի քան 300 հազար երեխաների ծնողներ:
«Սա բերում է նրան, որ 5–րդ և 6–րդ դասարանների դասագրքերն ամբողջությամբ անվճար են դառնում, որովհետև որպես սոցիալական կրեդիտ վերադարձվող 3000 դրամն ամբողջությամբ փակում է վարձավճարի չափը։ Մյուս դասարանների պարագայում միջինում 66 տոկոսով վարձավճարը նվազում է», – ասաց նախարարը։
