ԵՐԵՎԱՆ, 19 հունիսի./Նովոստի–Արմենիա/. Яндекс.Տաքսի ռուսական հայտնի ծառայությունը շուտով կսկսի գործել Հայաստանի տարածքում։
Ինչպես շաբաթ օրը Երևանում հայտնեց Яндекс.Տաքսի նախագծի մարկետինգի գծով տնօրեն Դանիլ Շուլեյկոն, ծառայությունը կսկսի գործել Հայաստանում հուլիսի 1–ից` առաջարկելով շահավետ պայմաններ ինչպես ուղևորներին, այնպես էլ վարորդներին։
«Վարորդները կվաստակեն ավելի շատ գումար, իսկ ուղևորները կծախսեն ավելի քիչ», – նշեց Շուլեյկոն BarCamp Yerevan 2016 երիտասարդական 8–րդ (չ)կոնֆերանսի ընթացքում։
Նրա խոսքով` Ռուսաստանում Яндекс.Տաքսիում վարորդներին աշխատանքի ընդունելուց առաջ ստուգում են ռուսաց լեզվի իմացությունը, իսկ Հայաստանում նման համակարգ դեռ չի լինի, չնայած այս ուղղությամբ աշխատանքն ընթանում է։
«Հենց հիմա քաղաքի փողոցներում երթևեկում են մոտ 50 հեծանվորդներ, ովքեր պարզապես լուսանկարում են ձեր քաղաքը` մեզ համար ստեղծելով Երևանի լավագույն քարտեզը, սա մեր առանձին նվերն է այս երկրի համար», – ընդգծեց Շուլեյկոն։
Նա ավելացրեց, որ քարտեզը պատրաստ կլինի մի քանի շաբաթից։ «Իհարկե, այս ամենը շատ թանկարժեք է, և դրանից կտուժի մեր բյուջեն, սակայն ի՞նչ արած», – ասաց Շուլեյկոն։
Նրա խոսքով` տաքսին աշխատելու է նոր սակագնով` 100 դրամ առաջին երկու կիլոմետրի դիմաց և ևս 100` յուրաքանչյուր հաջորդ կիլոմետրի դիմաց։ Ծառայությունը հասանելի կլինի Երևանում և մերձակա տարածքներում։
Շուլեյկոն նաև նշեց, որ Հայաստանում գործող ծառայության մեքենաների թիվը հասնում է մի քանի հարյուրի։
Яндекс.Տաքսին (Yandex.Taxi) ծառայություն է, որը թույլ է տալիս տաքսի պատվիրել շահավետ սակագներով` առանց հեռախոսազանգի։ Տաքսին կարելի է պատվիրել կայքի և iPhone, Android, Windows Phone պլատֆորմերի համար գործող Яндекс.Տաքսի բջջային հավելվածի միջոցով։
Ծառայության հիմնական առավելություններն են տաքսի պատվիրելու հարմարավետությունը, բանկային քարտով կամ կանխիկով վճարելու հնարավորությունը, շահավետ սակագները։ Մեքենան մոտենում է միջինը 7 րոպեում։
Ծառայությունն աշխատում է Ռուսաստանի խոշոր քաղաքներում` Մոսկվայում, Սանկտ Պետերբուրգում, Եկատերինբուրգում, Նիժնի Նովգորոդում, Կալինինգրադում, Տուլայում, Ուֆայում, Վորոնեժում և այլն։ Վարորդներն անցնում են հատուկ ատեստավորում, իսկ ավտոմեքենաները ստուգվում են` համապատասխան չափորոշիչներին համաձայն։–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում
