Հանձնաժողովն օմբուդսմենի պաշտոնի համար խորհրդարանին ներկայացրեց Արման Թաթոյանի թեկնածությունը

ԵՐԵՎԱՆ, 12 փետրվարի. /Նովոստի–Արմենիա/.  Որպես  Մարդու իրավունքների պաշտպանի թեկնածու՝ խորհրդարանի լիագումար նիստին պետաիրավական հարցերի մշտական հանձնաժողովը կներկայացնի քվեարկության արդյունքում որոշված` ՀՀԿ թեկնածու, Արդարադատության փոխնախարար Արման Թաթոյանի թեկնածությունը:

Արման Թաթոյանի թեկնածության օգտին կողմ քվեարկեց հանձնաժողովի  12 անդամներից  7-ը,  դեմ՝ 4 -ը:  Իսկ  Զարուհի Փոստանջյանի թեկնածության օգտին քվեարկեց 5 պատգամավոր` Էդմոն Մարուքյանը, Հովհաննես Մարգարյանը,  Արծվիկ Մինասյանը,  Տիգրան Ուրիխանյանը և ինքը՝ Զարուհի Փոստանջյանը:

Հանձնաժողովի անդամ Տիգրան Ուրիխանյանի կողմից առաջադրված Նարեկ Ալոյանը ստացավ  2 կողմ ձայն` Տիգրան Ուրիխանյանի և Արծվիկ Մանասյանի կողմից, ով, ի դեպ, բոլոր թեկնածուներին կողմ քվեարկեց։

Տեղեկացնենք, որ Պետաիրավական հարցերի մշտական հանձնաժողովի 12 անդամներից յուրաքանչյուրն իրավունք ուներ միաժամանակ քվեարկելու բոլոր թեկնածուների օգտին:

Ի դեպ, քվեարկությանը չէր մասնակցում Գագիկ Ջհանգիրյանը, ում վերաբերյալ Զարուհի Փոստանջյանը հայտարարեց, որ նա ոչ միայն հեռացավ, այլ հասցրեց գովերգել իշխանական թեկնածուին:

ՀՀԿ-ն Օմբուդսմենի պաշտոնում առաջարկել է Արդարադատության փոխնախարարի թեկնածությունը>>

Նախկին օմբուդսմեն Կարեն Անդրեասյանը, գործող կարգի համաձայն, 2016 թ.–ի հունվարի 13–ին և 18–ին խորհրդարան էր ներկայացրել հրաժարականի երկու դիմում։ «Մարդու իրավունքների պաշտպանի մասին» օրենքի համաձայն` Օմբուդսմենի լիազորությունները դադարեցվին, երբ  նա Ազգային ժողովին հրաժարական ներկայացնելուց ոչ ուշ, քան 10 օր հետո կրկնեցիր հրաժարականը, որը պաշտոնապես հաստատվեց փետրվարի 1-ի: -0-