Նախորդ շաբաթվա կարևորագույն նորությունների հնգյակը
18.06.2016,
10:00
«Նովոստի–Արմենիա» գործակալությունը ներկայացնում է նախորդ շաբաթվա կարևորագույն նորությունների հնգյակը:
ԵՐԵՎԱՆ, 18 հունիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է նախորդ շաբաթվա կարևորագույն նորությունների հնգյակը։
- ՌԴ նախագահ Վլադիմիր Պուտինը հունիսի 20–ին Սանկտ Պետերբուրգում Հայաստանի և Ադրբեջանի նախագահներ Սերժ Սարգսյանի ու Իլհամ Ալիևի հետ կքննարկի ղարաբաղյան հակամարտության կարգավորման հարցը։ Միաժամանակ ԵԱՀԿ–ի մամուլի հետ կապերի բաժնի ղեկավարի պաշտոնակատար Նատաշա Ռաջակովիչը հայտնել է, որ ԵԱՀԿ–ն չի մասնակցում Սանկտ Պետերբուրգում նախագահների եռակողմ գագաթնաժողովի նախապատրաստական աշխատանքներին։ Նրա խոսքով` ԵԱՀԿ–ն ներգրավված չէ ղարաբաղյան հարցին նվիրված պետերբուրգյան գագաթնաժողովի կազմակերպչական հարցերում, և «մենք չենք կարող այն մեկնաբանել»։ ՀՀ ԱԺ փոխխոսնակ Էդուարդ Շարմազանովն այս կապակցությամբ հայտարարել է, որ Հայաստանի, Ռուսաստանի և Ադրբեջանի նախագահներ Սերժ Սարգսյանի, Վլադիմիր Պուտինի և Իլհամ Ալիևի` հունիսի 20-ին սպասվող եռակողմ հանդիպումը չպետք է ԵԱՀԿ Մինսկի խմբի համանախագահների հետ տարաձայնության պատճառ դառնա։
- Իշխանամետ և ընդդիմադիր խմբակցությունների ներկայացուցիչները Ընտրական օրենսգրքում ընտրական գործընթացների վերահսկողության տեխնիկական մեխանիզմների ներդրման շուրջ փոխըմբռնման հայտարարություն են ստորագրել։ Հայտարարությունը, մասնավորապես, ստորագրել են Դաշնակցության խորհրդարանական խմբակցության ղեկավար Արմեն Ռուստամյանը, արդարադատության նախարար Արփինե Հովհաննիսյանը, կառավարության աշխատակազմի ղեկավար–նախարար Դավիթ Հարությունյանը, Հայաստանի Ազգային ժողովի պետաիրավական հարցերի մշտական հանձնաժողովի նախագահ, Հայաստանի հանրապետական կուսակցության խորհրդարանական խմբակցության անդամ Հովհաննես Սահակյանը։
- Հայաստանի հավաքականի և Դորտմունդի «Բորուսիայի» կիսապաշտպան Հենրիխ Մխիթարյանի գործակալը` Մինո Ռայոլան, հայտարարել է, որ Մխիթարյանը ցանկանում է տեղափոխվել «Մանչեսթեր Յունայթեդ»։ Ավելի ուշ հայտնի դարձավ, որ Մխիթարյանի տրանսֆերը «Մանչեսթեր Յունայթեդ» ձախողվել է։ Անգլիական ակումբը հայ ֆուտբոլիստի համար առաջարկել է 19 միլիոն ֆունտ, սակայն «Բորուսիան» հրաժարվել է վաճառել Մխիթարյանին Մաթս Հյումելսին և Իլկայ Գյունդողանին կորցնելուց հետո։
- «Հիդրոմետ» ծառայության օդերևութաբանական կենտրոնի պետի տեղակալ Գագիկ Սուրենյանի խոսքով` հունիսի 16–ից մինչև 21-ը հանրապետության տարածքում գործելու է միջերկրածովային ցիկլոնը, ինչի հետևանքով գրեթե բոլոր մարզերում ժամանակ առ ժամանակ սպասվում է անձրև և ամպրոպ, իսկ երեկոյան ժամերին առանձին հատվածներում հնարավոր են ինտենսիվ անձրևներ և կարկուտ։
- Շուրջ 135 ֆիլմեր կներկայացվեն Երևանում հուլիսի 10–17–ը նախատեսված «Ոսկե ծիրան» միջազգային 13–րդ փառատոնի մրցութային և արտամրցութային ծրագրերում։ «Ոսկե ծիրանի» շրջանակում այս տարի նախատեսված են մի շարք ծրագրեր` «Հայկական կինո. արդի ժամանակներ», «Վիլյամ Շեքսպիրի մահվան 400–րդ տարելիցին» նվիրված ծրագիրը, ինչպես նաև «Ֆրանսիական նոր կինո», «Դանիական նոր կինո» և «Բասկական նոր կինո» ծրագրերը։ Կինոփառատոնի շրջանակում Կարապի լճի տարածքում կկազմակերպվեն բացօթյա կինոդիտումներ։ Փառատոնի բոլոր օրերին Ազնավուրի անվան հրապարակում կհնչի երևանյան ջազ՝ անվանի ջազ գործիչների և ջազ բենդերի մասնակցությամբ:–0–
Պատճենել հղումը
