ԵՐԵՎԱՆ, 15 հունիսի. /Նովոստի–Արմենիա/. Շուրջ 135 ֆիլմեր կներկայացվեն Երևանում հուլիսի 10–17–ը նախատեսված «Ոսկե ծիրան» միջազգային 13–րդ փառատոնի մրցութային և արտամրցութային ծրագրերում։
«Այս տարի անցկացվող «Ոսկե ծիրանը» մեզ համար ունի առանձնահատուկ նշանակություն, քանի որ այս տարի մենք նշում ենք Հայաստանի անկախության 25–րդ տարեդարձը, չէ՞ որ փառատոնն այդ անկախության ծնունդն է», – չորեքշաբթի ասուլիսի ժամանակ նշեց ՀՀ մշակույթի նախարար Հասմիկ Պողոսյանը։
Նա ավելացրեց, որ փառատոնի շրջանակում կներկայացվի «Հայկական կինո. արդի ժամանակներ» ծրագիրը, որտեղ ներառված են վերջին 25 տարում նկարահանված հայկական լավագույն ֆիլմերը։
Միջազգային կինոփառատոնի հիմնադիր, կինոռեժիսոր Հարություն Խաչատրյանն իր հերթին նշեց, որ «Ոսկե ծիրանի» շրջանակում կցուցադրվեն վերջին շրջանում միջազգային լավագույն փառատոններին մասնակցած ֆիլմերը։
«Կներկայացվեն դանիական, իրանական ֆիլմեր, որոնք երբեք չեն մասնակցել փառատոնին», – ավելացերց Խաչատրյանը։
Նա նշեց, որ փառատոնը կմեկնարկի Հայաստանում 90 տարի առաջ նկարահանված «Զարե» ֆիլմով, որն առաջին ֆիլմն է` նվիրված քրդերին և եզդիներին։
«Այս տարի փառատոնին կմասնակցեն մեծ թվով հայկական ֆիլմեր», – ավելացրեց Խաչատրյանը։
Նա չնշեց կինոյի և արվեստի հայտնի գործիչների անունները, որոնք այս տարի հրավիրված են Երևան։ Խաչատրյանը հայտնեց, որ նրանց անունները կհրապարակվեն փառատոնի մեկնարկից մեկ շաբաթ առաջ։ «Կարող եմ միայն ասել, որ այս տարի փառատոն կայցելեն հայտնի ռեժիսորներ` Դանիայից, Ֆրանսիայից, Բասկերի երկրից և Գերմանիայից», – ավելացրեց Խաչատրյանը։
«Ոսկե ծիրանի» շրջանակում այս տարի նախատեսված են մի շարք ծրագրեր` «Հայկական կինո. արդի ժամանակներ», «Վիլյամ Շեքսպիրի մահվան 400–րդ տարելիցին» նվիրված ծրագիրը, ինչպես նաև «Ֆրանսիական նոր կինո», «Դանիական նոր կինո» և «Բասկական նոր կինո» ծրագրերը։
«Ոսկե ծիրան» միջազգային կինոփառատոնը Երևանում անցկացվում է 2004թ.-ից, այն տարածաշրջանի ամենաճանաչված փառատոներից մեկն է: Փառատոնը կազմակերպվում է ՀՀ մշակույթի նախարարության և VivaCell-MTS ընկերության աջակցությամբ։ Տարբեր տարիներին Հայաստան են ժամանել հայտնի դերասաններ և ռեժիսորներ, որոնց թվում նաև` գրող և սցենարիստ Տոնինո Գուերան, հայտնի դերասանուհիներ Կլաուդիա Կարդինալեն և Ֆանի Արդանը։
«Նովոստի–Արմենիա» գործակալությունը փառատոնի ինֆորմացիոն հովանավորն է։
2010 թվակաժնին Երևանի կինոփառատոնն արժանացավ Ficts Plate D'honneur կինոյի, հեռուստատեսության և սպորտի միջազգային միության գլխավոր մրցանակին:–0–
Ծանոթացեք լուրերին առաջինն ու քննարկեք դրանք մեր Telegram-յան ալիքում