Սարգսյան-Պուտին-Ալիև հանդիպումը չպետք է տարաձայնություններ առաջացնի Մինսկի խմբի հետ. Շարմազանով

ԵՐԵՎԱՆ, 15 հունիսի. /Նովոստի-Արմենիա/. Հայաստանի, Ռուսաստանի և Ադրբեջանի նախագահներ Սերժ Սարգսյանի, Վլադիմիր Պուտինի և Իլհամ Ալիևի` հունիսի 20-ին սպասվող եռակողմ հանդիումը չպետք է ԵԱՀԿ Մինսկի խմբի համանախագահների հետ տարաձայնության պատճառ դառնա, չորեքշաբթի լրագրողներին ասաց ԱԺ-ի փոխխոսնակ Էդուարդ Շարմազանովը:

Նրա խոսքով, դրանում ոչ մի արտասովոր բան չկա, ուղղակի հանդիպումը կազմակերպում է ռուսական կողմը:

«Ռուսաստանը ԵԱՀԿ ՄԽ-ի համանախագահող երկիր է, և առաջին անգամը չէ, որ նախագահների հանդիպումն անցկացվում է համանախագահող երկրներից մեկի նախաձեռնությամբ: Նույն հաջողությամբ հանդիպումներ են կազմակերպել Ֆրանսիան և ԱՄՆ-ն», - ասաց Շարմազանովը:

Ընդ որում, նա ընդգծեց, որ միջնորդները բազմիցս նշել են ղարաբաղյան համակարտության կարգավորման հարցի շուրջ միասնական մոտեցում ունենալու մասին:

Փոխխոսնակի կարծիքով, նմանատիպ հանդիպումները կարելի է բանակցությունների սկիզբ համարել: «Յուրաքանչյուր հանդիպում, նույնիսկ` ոչ արդյունավետ, բանակցային գործընթացը վերսկսելու և հակամարտությունը խաղաղ ճանապարհով կարգավորելու հույս է տալիս», - ասաց Շարմազանովը:

Նա նշեց, որ Վիեննայում կայացած վերջին հանդիպման ընթացքում ձեռքբերված պայմանավորվածությունները չեն իրականացվում, քանի որ ադրբեջանական կողմը շարունակում է իր քաղաքականությունը և ոչ կառուցողական հայտարարություններ է հնչեցնում:

Ինչ վերաբերում է բանակցությունների սեղանի շուրջ Ղարաբաղի բացակայության պայմաններում բանակցային գործընթացի արդյունավետությանը, Շարմազանովը նշեց, որ կարելի է դուռը շրխկացնել և հեռանալ, սակայն նման դեմարշը ճիշտ որոշում չի լինի, քանի որ կարելի է հետևողական աշխատանքներ վարել և հասնել նրան, որ Ղարաբաղը դառնա բանակցային գործընթացի լիիրավ անդամ:

«Պատահական չէ, որ նաև համանախագահներն են ասում, որ բանակցությունների ամենավճռորոշ և կարևոր փուլում Ղարաբաղը պետք է պարտադիր բանակցությունների կողմ դառնա: Ակնհայտ է, որ առանց Ղարաբաղի հնարավոր չէ լուծել այս հարցը, քանի որ, երբ համանախագահները խոսում են 1994 թ.-ի հրադադարի մասին, պետք է նշել, որ այս փաստաթուղթը նախևառաջ ստորագրել է Լեռնային Ղարաբաղը», - ասաց Շարմազանովը:

Ղարաբաղյան հակամարտությունը սկիզբ է առել 1988 թ.-ին, երբ հիմնականում հայերով բնակեցված Լեռնային Ղարաբաղը հայտարարեց Ադրբեջանի կազմից դուրս գալու մասին։ 1991 թ. դեկտեմբերի 10-ին, Խորհրդային Միության փլուզումից մի քանի օր առաջ, Լեռնային Ղարաբաղում տեղի ունեցավ հանրաքվե, որի ժամանակ բնակչության ճնշող մեծամասնությունը՝ 99,89 տոկոսը Ադրբեջանից ամբողջովին անկախանալու կողմ քվեարկեց։

Դրանից հետո սկսվեցին լայնամասշտաբ ռազմական գործողություններ, որոնց հետևանքով Ադրբեջանը կորցրեց վերահսկողությունը Լեռնային Ղարաբաղի և նրան հարակից յոթ շրջանների նկատմամբ։

1994 թ.-ի մայիսի 12-ին՝ զինադադարի մասին համաձայնագրի ուժի մեջ մտնելուց հետո հակամարտության գոտում դադարեցին ռազմական գործողությունները։ Պատերազմի հետևանքով երկու կողմից զոհվեց մոտավորապես 25-30 հազ մարդ և մոտ մեկ միլիոնը ստիպված եղավ լքել բնակավայրերը։

Զինադադարի ռեժիմի մասին համաձայնությունը պահպանվում է մինչ այժմ։ 1992 թ.-ից մինչ օրս ընթանում են բանակցություններ հակամարտության խաղաղ կարգավորման ուղղությամբ ԵԱՀԿ Մինսկի խմբի շրջանակներում, որի համանախագահներն են ԱՄՆ-ն, Ռուսաստանը և Ֆրանսիան։ -0-