ԵՐԵՎԱՆ, 26 նոյեմբերի. /Նովոստի–Արմենիա/. Հայ խոհարարները կզբաղվեն ազգային ճաշատեսակների բրենդավորմամբ, երկուշաբթի ասուլիսի ժամանակ ասաց «Հայ խոհարարական ավանդույթների զարգացման և պահպանման» ՀԿ-ի ղեկավար Սեդրակ Մամուլյանը։
Նրա խոսքով, բոլոր հայկական ազգային ճաշատեսակների բրենդավորումն ու առաջխաղացումն անհնար է, քանի որ դրանք հազարից ավել են։
«Այն երկրները, որոնք հասել են բարձունքի խոհարարական ոլորտում, աշխատել են 25–30 ճաշատեսակներից բաղկացած կարճ ու մշակված ցանկի վրա։ Մենք կգնանք այդ ճանապարհով», – ասաց Մամուլյանը։
Загружается новость ... "Лево"
Նա բերեց վրացական խոհանոցի օրինակը, որտեղ կան ճաշատեսակներ, որոնց հիշատակումից միանգամից պարզ է դառնում, որ դրանք վրացական են։
«Բրենդավորման աշխատանքները մենք ուզում ենք իրականցնել այնպես, որ դրանք հիմնված լինեն հնագիտական, պատմական և էթնոգրաֆիկ աղբյուրների վրա», – նշեց Մամուլյանը։
Անդրադառնալով այն հարցին, թե որ ճաշատեսակները կարող են դառնալ հայկական բրենդ` խոհարարը նշեց, որ դրանք պետք է լինեն այն ճաշատեսակները, որոնք հստակ կարող են արտացոլել հայկական խոհանոցի առանձնահատկությունները, ինչպես նաև բաղկացած կլինեն այնպիսի բաղադրիչներից, որոնք հասանելի են Հայաստանի սահմաններից դուրս։
«Հարկավոր է վերցնել մի քանի նախուտեստ, տաք ճաշատեսակներ, ապուրներ և հիմնական ճաշատեսակներ», – ասաց Մամուլյանը։
Խոհարարի խոսքով, նման ճաշատեսակների թվում ներառված են տոլման, ղափաման և ժենգյալով հացը։–0–
