Երեքշաբթի` մայիսի 3–ի առավել ուշագրավ նորությունները

ԵՐԵՎԱՆ, 4 մայիսի. /Նովոստի–Արմենիա/. «Նովոստի–Արմենիա» գործակալությունը ներկայացնում է երեքշաբթի` մայիսի 3–ի առավել ուշագրավ նորությունների սեփական տարբերակը։

• Հայաստանի կառավարությունն իր հերթական նիստի օրակարգում ընդգրկել է Լեռնային Ղարաբաղի Հանրապետության ճանաչման մասին օրենքի նախագիծը։ Օրինագծի հեղինակներն են ընդդիմադիր պատգամավորներ Զարուհի Փոստանջյանը և Հրանտ Բագրատյանը։ Այս հարցի շուրջ իրենց կարծիքն են հայտնել փորձագետները։ Մասնավորապես, Միջազգային իրավունքի ռուսական ասոցիացիայի անդամ, հրապարակախոս Դենիս Դվորնիկովը կարծում է, որ Հայաստանի կողմից Ղարաբաղի ճանաչման մասին օրինագծերի նման նախագծերը չեն ներկայացվում քննարկման, որպեսզի մերժվեն։ Իսկ Կովկասի ինստիտուտի Քաղաքական հետազոտությունների դեպարտամենտի ղեկավար Սերգեյ Մինասյանը կարծում է, որ Ղարաբաղը ճանաչելու օրինագիծը շփման գծում հետագա սրումից Ադրբեջանին զսպելու տարր է։ Այս կապակցությամբ հայտարարություն է տարածել նաև ՀՀ ԱԳՆ–ն։ Մասնավորապես, ՀՀ փոխարտգործնախարար Շավարշ Քոչարյանը հայտարարել է, որ եթե Ադրբեջանը ծավալի նոր ռազմական ագրեսիա, Լեռնային Ղարաբաղի ճանաչման հարցը կմտնի օրակարգ։

• ՀՀ հատուկ քննչական ծառայությունում նախօրեին քրեական գործ է հարուցվել Արդարադատության նախարարության ԴԱՀԿ արդեն նախկին պետ Միհրան Պողոսյանի նկատմամբ`Պանամայի օֆշորային գործարքների հետ կապված սկանդալային նյութերով։

• Հայաստանի պաշտպանության նախարարի մամուլի քարտուղար Արծրուն Հովհաննիսյանը երեքշաբթի հերքել է երկրում զորահավաք հայտարարելու վերաբերյալ շրջանառվող լուրերը։ Նա նաև նշել է, որ հայկական կողմը կուսումնասիրի Ադրբեջանի նախագահ Իլհամ Ալիևի կողմից` եզդի զինծառայող Քյարամ Սլոյանին գլխատած զինվորական հանցագործի պարգևատրման փաստը։ Հովհաննիսյանը նաև հայտարարել է, որ Հայաստանը իրականացնում է բանակի ծրագրավորված վերասպառազինում և ունի ամենաժամանակակից զենքը։

• Հայաստանի առաջին նախագահ Լևոն Տեր–Պետրոսյանը, ով այցելել է Ստեփանակերտ և հանդիպել ԼՂՀ նախագահ Բակո Սահակյանի հետ, մատնանշել է Հայաստանի և ԼՂՀ–ի իշխանությունների վճռականությունն ու հաստատակամությունը։

• ԱԻՆ «Հիդրոմետ» ծառայության օդերևութաբանության կենտրոնի պետի տեղակալ Գագիկ Սուրենյանը «Նովոստի–Արմենիա» գործակալությանը հայտնել է, որ մայիսի 4–ին Հայաստանին կմոտենա հերթական ցիկլոնը:

• Մամուլի ներկայացուցիչները, որոնք ներկա են եղել «Եվրատեսիլ 2016»-ի առաջին կիսաեզրափակչի մասնակիցների առաջին փորձին, լավագույնն են ճանաչել Իվետա Մուկուչյանի ելույթը։ Բացի այդ, միջազգային բուքմեյքերական գրասենյակները կտրուկ ավելացրել են «Եվրատեսիլ 2016» երգի միջազգային մրցույթում Հայաստանի հաղթանակի շանսերը:-0-