ԵՐԵՎԱՆ, 3 մայիսի. /Նովոստի-Արմենիա/. Հայաստանը իրականացնում է բանակի ծրագրավորված վերասպառազինում և ունի ամենաժամանակակից զենքը, երեքշաբթի լրագրողներին ասաց պաշատպանության նախարարի մամուլի քարտուղար Արծրուն Հովհաննիսյանը:
Նրա խոսքով, նոր ռազմական տեխնիկայով բանակի սպառազինման ծրագիրը կապված չէ միայն ռուսական վարկի հետ, քանի որ ավելի վաղ ևս իրականացվում էր նման ծրագիր։
«Մենք բազմիցս հայտարարել ենք, որ համակարգված վերասպառազինում ենք բանակը: Ոչ վարկային միջոցների հաշվին ձեռք է բերվել սպառազինության աննախադեպ քանակ: Մեր զինանոցում առկա է շատ ժամանակակից զենք, որի մասին մի շարք զարգացած երկրներ կարող են միայն երազել», - ասաց Հովհաննիսյանը:
Ընդ որում, նա նշեց, որ միայն ռուսական վարկով Հայաստանը ձեռք կբերի տարբեր տեսակի սպառազինություն, որը պարտադիր չէ հրաձգային լինի:
Հովհաննիսյանն ընդգծեց, որ բանակի համար չափազանց կարևոր են նաև ռազմավարական տարրերը, հետախուզական սարքավորումները և այլն, որոնք կմատակարարվեն ռուսական վարկի շրջանակում:
Ընդ որում, նա նշեց, որ մատակարարման գործընթացն արդեն սկսված է: Միաժամանակ, նա ձեռնպահ մնաց ներկայացնել մանրամասներ` պատճառաբանելով, որ դա ռազմական գաղտնիք է:
Ռազմական նշանակության ռուսական արտադրանքի մատակարարման ֆինանսավորման նպատակով Հայաստանի և Ռուսաստանի կառավարությունները ստորագրել են համաձայնագիր` Երևանին մինչև 200 մլն դոլարի չափով պետական էքսպորտային վարկի տրամադրման մասին` տասը տարի ժամկետով, մինչև 2018 թ.–ը վճարի տարկետմամբ։ –0–