ԵՐԵՎԱՆ, 3 մայիսի. /Նովոստի-Արմենիա/. Միջազգային բուքմեյքերական գրասենյակները կտրուկ ավելացրել են «Եվրատեսիլ 2016» երգի միջազգային մրցույթում Հայաստանի հաղթանակի շանսերը:
Այսպես, Williamhill հայտնի բուքմեյքերական գրասենյակը Հայաստանը ներկայացնող Իվետա Մուկուչյանի հաղթանակի խաղադրույքներն ընդունում է 17,0 գործակցով, ինչը բոլոր մասնակիցների շրջանում 6-րդ ցուցանիշն է:
Դեռ մարտի կեսերին Միացյալ Թագավորության խոշորագույն բուքմեյքերական գրասենյակներից մեկի փորձագետները հայ երգչուհուն 29,0 գործակցով տալիս էին ընդամենը 12-րդ տեղը։
Բուքմեյքերների կարծիքով, մրցույթի ֆավորիտն է մնում Ռուսաստանը ներկայացնող Սերգեյ Լազարևը, որի հաղթանակի շանսերը գնահատվում են 3,0 գործակցով։ Երկրորդ տեղում, ըստ մասնագետների, Ֆրանսիան է (3,50), իսկ երրորդից հինգերորդ տեղերը կիսում են միանգամից երեք երկիր` Ավստրալիան, Մալթան և Շվեդիան (15,0)։
Հայ բուքմեյքերները ևս սկսել են ավելի շատ հավատալ Մուկուչյանի հաղթանակին: Նրա հաղթանակի շանսերը նրանք ևս գնահատում են 17 գործակցով։
ԶԼՄ–ների ներկայացուցիչները Հայաստանը լավագույնն են ճանաչել «Եվրատեսիլ 2016»-ում>>
Իվետա Մուկուչյանը LoveWave երգով հանդես կգա «Եվրատեսիլ-2016»-ի առաջին կիսաեզրափակչում, որն այս տարի տեղի կունենա Շվեդիայի մայրաքաղաք Ստոկհոլմում` Come together (Միավորվենք) կարգախոսի ներքո: Մրցույթի կիսաեզրաձակիչները կկայանան մայիսի 10-ին, 12-ին և 14-ին: Այս տարի «Եվրատեսիլ»-ին կմասնակցեն 43 երկրների ներկայացուցիչներ: -0-
