Երևանի կենտրոնում մեկնարկել է հանրահավաք` ընդդեմ Ղարաբաղում միջազգային կազմակերպությունների անգործության

ԵՐԵՎԱՆ, 9 ապրիլի./Նովոստի–Արմենիա/. Հանրապետության հրապարակում մեկնարկել է բողոքի հանրահավաք` ղարաբաղա-ադրբեջանական շփման գծում իրավիճակի կտրուկ սրման կապակցությամբ միջազգային կազմակերպությունների հանցավոր լռության դեմ:

Միջոցառումը կազմակերպվել է ԵԱՀԿ ՄԽ համանախագահների հայաստանյան այցի կապակցությամբ:

Հավաքվածներն իրենց հետ բերել են Հայաստանի, ԼՂՀ–ի դրոշներ, մոմեր և պաստառներ։

Հայ երիտասարդները ԵԱՀԿ ՄԽ–ին ներկայացրեցին ղարաբաղյան իրավիճակին վերաբերող իրենց պահանջները>>

Ցույցի կազմակերպիչները նշում են, որ Ադրբեջանի կողմից ապրիլի 2-ին ԼՂՀ սահմանի ողջ երկայնքով սանձազերծված քառօրյա պատերազմը և դրան հաջորդած փխրուն զինադադարը, մինչ այս պահը որևէ հստակություն չեն մտցրել հակամարտության կարգավորման տեսլականի մեջ։

«Ռազմական գործողությունների ընթացքում նկատվեց միջազգային հանրության և, հատկապես, հակամարտության կարգավորման գործում առաջնային ներգրավվածություն ունեցող կառույցների և երկրների մի մասի հանցավոր լռությունը կամ ոչ պակաս հանցավոր հավասարության նշան դնելը ՀՀ, ԼՂՀ և Ադրբեջանական կողմի գործողությունների մեջ», - ասվում է հայտարարության մեջ։

Րոպեներ առաջ Արտգործնախարարության շենքի մոտ անցկացվեց ակցիա` հարյուրավոր երիտասարդների մասնակցությամբ, ովքեր ԵԱՀԿ ՄԽ–ից պահանջեցին ներառել ԼՂՀ–ին ղարաբաղյան հակամարտության կարգավորմն բանակցային գործընթացի մեջ։Ապրիլի 1-ի լույս 2-ի գիշերը ղարաբաղաադրբեջանական շփման գծի հարավային, հարավարևելյան և հյուսիսարևելյան ուղղություններով հակառակորդը ձեռնարկել է բացահայտ հարձակվողական գործողություններ` հրետանիով, զրահապատ տրանսպորտային միջոցներով և ավիացիայով: ԼՂՀ պաշտպանության բանակը հաջողությամբ ճնշել է հակառակորդի գործողությունները` հասցնելով մեծ վնասներ։–0–