Երևանի կողմից ադրբեջանցի դիվերսանտի մարմնի վերադարձը մարդասիրության և տարրական մարդկության ակտ է. Նալբանդյան

ԵՐԵՎԱՆ, 10 մարտի. /Նովոստի–Արմենիա/. Երևանի կողմից ադրբեջանցի դիվերսանտի մարմնի վերադարձը մարդասիրության և տարրական մարդկության ակտ է, ուրբաթ ասաց ՀՀ ԱԳ նախարար Էդվարդ Նալբանդյանը Հունաստանի ԱԳ Նախարար Նիկոս Կոձիասի հետ ճեպազրույցի ընթացքում։

Երևանը փետրվարի 5–ին Բաքվին է փոխանցել Ադրբեջանի ԶՈւ–ի զինծառայողի մարմինը, ով սպանվել էր 2016 թ.–ի դեկտեմբերի 29–ին Տավուշի մարզում ադրբեջանական դիվերսիայի կանխման ժամանակ։ 2016 թ.–ի դեկտեմբերի 29–ին վաղ առավոտյան ադրբեջանցի զինծառայողները դիվերսիոն ներթափանցման փորձ էին ձեռնարկել Տավուշի մարզի Չինարի գյուղի մոտակայքում։ Դիվերսիոն փորձի կանխման ժամանակ զոհվեց երեք հայ զինծառայող։ Ադրբեջանի ԶՈւ–ի կորուստները, այդ թվում հայկական կողմի պատժիչ գործողությունների արդյունքում, կազմել են շուրջ 12 մարդ։

«Մենք չենք կարող հասնել Ադրբեջանի մակարդակին, չէ՞ որ հենց դավանած արժեքներով, մարդասիրությամբ է քաղաքակիրթ աշխարհը տարբերվում Ադրբեջանից` մի երկրից, որտեղ դիվերսանտները, մարդասպաններն ու դահիճներն արժանանում են ազգային հերոսի կոչման», – ասաց Նալբանդյանը։

Նա ընդգծեց, որ և' Հայաստանը, և' Արցախը խստորեն հետևում են միջազգային հումանիտար իրավունքին և համապատասխան կոնվենցիաներին և դրանցից բխող հանգամանքներին, որոնցից մեկը զոհվածների մարմինների վերադարձն է։

«Սակայն այստեղ խոսքը ոչ միայն կոնվենցիաների կամ միջազգային իրավունքի մասին է, պարզապես հարկավոր է մնալ մարդ, անգամ, եթե հակառակորդը իրեն մարդկային ձևով չի պահում։ Հենց դրանում է Հայաստանի և Ադրբեջանի միջև գոյություն ունեցող հսկայական տարբերությունը», – ասաց Նալբանդյանը։–0–